Ante-scriptum: Tous les articles paraissant dans la rubrique ‘Politique’ ne reflètent pas nécessairement l’opinion du club

انتهى المسلسل الميكسيكي الطويل « الحب في زمن الكفاءات المستقلة » بطولة الحبيب الجملي و اخراج راشد سبيلبيرغ الغنوشي بنهاية تراجيدية، و منجمش سي لحبيب يوصل لمعشوقته الحكومة بعد ما ولاد عم العروسة النواب رفضوه و طردوه، رغم اللي هو جاب جماعتو المستقلين الأكفاء و عمل موسم بالفم و الملا.

اما ردو بالكم، السهرية مازالت متواصلة و البرايم تايم باش يكون ناري! انتم على موعد، سيداتي آنساتي ساداتي، مع فيلم السهرة على طريقة مارفل: « كابتن اخشيدي »! فبعد ما فشل سي لحبيب، جانا رئيسنا « التوب رجلة »، حبيب الشعب، و باش ينقذنا و يلحملنا حكومة كيما نحبو!

هو صحيح رئيسنا ماللي شد معمل شيء يذكر، لكنو عنق البطالة و هبلهم بوس ( حنين شباش نعملولو )، و مشا ذكر الجماعة في المناطق الداخلية انهم مهمشين و حالتهم متعبة، و لازم دستور نعملوه بالكتيبة اللي يكتبوها المفرخ عالحيوط، و جاب اردوغان يتمقعر على ريحة القصر … اما هو رئيس الشعب، و يقعد على كرسي بلاستيك ابيض و متزهد، و هو اللي باش يوحد الجميع و يشكللنا الحكومة بعد ما اولاد عموماتها رفضو.

و باش ينجم يشكللنا الحكومة هاذي، بطلنا عندو سلاح قوي : التوافق! ماكم تعرفو كان عنا برشا ابطال يستعملوه السلاح هذا، و ضهر بالكاشف انو اقوى سلاح. أما كيفاش يستعملوه؟

ساهل ياسر! مادام ولاد عمومة الحكومة بُلًدَاء و نرفوزيين، و عندهم كان العياط و الزياط و فمهم ما يتسكرش، اللي يحل فمو حطلو مغرفة توافق حتي لين يشبع. بالطبيعة المغارف تفرق، و الطنجرة ديما في يدين العم الكبير. ولاد خالاتها شيهمك فيهم تو يقعدو يعيطو يعيطو، سكتهم بشوية « الوطن في خطر » و « استقرار سياسي » و كذا و كذا، و رد بالك الشيخ يتنرفز.

و هكا رئيسنا ينقذنا و يشكل الحكومة، و نعيشو الديمقراطية و الرخاء، و نرجعو بترولنا و ملحنا، و نبدلو شعار الجمهورية الرخ لا، و نعيشو في قصر قرطاج مبعضنا فرد بيت.

انتظرونا في المسلسل الجاي بعنوان « الحكومة طلعت حبلة .. رحلة البحث عن الاب »!