عسلامة الناس الكل، الarticle هذا بش يكون موجه بالأساس للجماعة لي نجحو فالباك و مازالو حايرين فالتوجيه متاعهم. اول حاجة نحب نقلكم مبروك و غصرة و تعدات حمدالله ، على عكس ال posts لي يدورو عالFacebook و غيرو من مواقع التواصل الاجتماعي لي تحس هدفها بالأساس انو يخوفو التلامذة لي نجحو فالباك نحب نقلكم تستنا فيكم تجربة جديدة و مزيانة داخل أسوار الجامعة لي بش تختارو انكم تقراو فيها.

انا ليوم بش نحكيلكم عال fac اللي نقرا فيها انا واللي هي « المعهد العالي للعلوم الانسانية بتونس جامعة تونس المنار » واللي معروفة بإسم ابن شرف. في ابن شرف تنجم تلقى اختصاصات متعددة : الاجازة ( الأساسية أو التطبيقية ) في العربية، الفلسفة، الفرنسية، الايطالية، الاسبانية، الالمانية، الانجليزية، علم النفس، لغة الاشارات، علم الاجتماع ؛ علم الاثار، الAnthropologie و غيرهم .. تلقاو القائمة الكاملة للاختصاصات هذي بداية من الصفحة 26 من دليل التوجيه الجامعي 2018.

كأي طالب جديد اول سؤال يخطر على البال : فما نظام غيابات ؟ و الجواب هو لا، نظام الغيابات غير معتمد في المعهد متاعنا فالوقت الحالي.

بما اني طالبة فاللغة و الآداب و الحضارة الانجليزية، بش نحاول نعطيكم فكرة عالمواد لي تقراوها فالسنة الأولى :

– الحضارة البريطانية( British civ ) و اللي نقراو فيها على الحضارة البريطانية و تاريخها ( مادة اساسية )

– الحضارة الامريكية (American civ ) و اللي نقراو فيها على تاريخ الولايات المتحدة الأمريكية ( مادة اساسية )

– عنا زادة ال ( Literature ) و اللي ينقسم إلى ثلاثة مواد و اللي هوما ( Drama /fiction/poetry)، تصير بيناتهم قرعة و تعديو وحدة منهم كل مرة ( مادة اساسية )

– Grammar

– Pronunciation

– Translation

– Reading&writing

– Oral expression

– عربية و فرنسية

بالنسبة للامتحانات في كل semestre تعدي 2 DS، و يتم احتساب العدد الأفضل. ال DS يشكل 30% من معدل ال unité (الوحدة)  و بالطبيعة فما الاختبار النهائي لي يشكل 70% من معدل الوحدة .

المعهد متاعنا ناقص انشطة ثقافية و ترفيهية، و عدد النوادي فيه قليل ياسر. على هذاكا معملين عليكم بش تزيدو تحطو لمساتكم  الخاصة و نخلقو مع بعضنا من ابن شرف معهد يتحب.

بالطبيعة الحياة الجامعية مش كلها ورد و نوار و بعيدة كل البعد عاللي نراوه فالأفلام، اما هي زادة خطوة مهمة ياسر في حياة كل واحد فينا، و منها هي بش تحدد مستقبلك و ترسمو بيديك.

We are the creators of our own destiny― Garth Stein

مرحبا بيكم في ابن شرف ❤