نواصلو اليوم مع منتخبات المجموعتين C و D، مجموعتين نستناو منهم برشا مفاجآت باعتبار إنو الحظوظ الكل قايمة.

المجموعة C يا سيدي تظم كل من فرنسا، الدنمارك، أستراليا و البيرو.

فيها 3 منتخبات تشارك للمرة الخامسة في تاريخها في المونديال و تترشح السنة من ال play off و إلي هوما :

– البيرو إلي فازت على نيوزيلندا في آخر ماتش ليها باش ترشحت.

– أستراليا الي ازاحت المنتخب السوري.

– الدنمارك إلي انظمت للمونديال هي زادة في الملحق متاع أوروبا.

البيرو تعود مالا السنة بعد 36 عام من الغياب، و من أجمل الطرائف إلي تلاحق البيرو اقتران مشاركتها عام 78 بفضيحة « القمح »، وقتها كانت هي و جاراتها البرازيل و الأرجنتين في نفس المجموعة و كانت الأرجنتين تحتاج لعدد مهم من الأهداف باش تنجم تترشح عاد يقولوا إنو البيرو سيبتلها الماتش مقابل 100 ألف طن من القمح عطاتهملها الأرجنتين.

أستراليا كانت قد شاركت اول مرة في تاريخها في المونديال عام 74 و أحرزت أفضل نتيجة ليها في ألمانيا عام 2006 كيف وصلت للدور الثاني.

الدنمارك انظم للعرس الكروي عام 86 لأول مرة في تاريخو و كان قد وصل في 98 لربع النهائي.

أما المرشح الأبرز على رأس المجموعة هاذي هو فرنسا.

المجموعة D مجموعة تتربع على عرشها الأرجنتين الوصيف متاع آخر نسخة من المونديال وفيها كل من كرواتيا و نيجيريا و أيسلندا.

مجموعة كلها توازن و الحظوظ الكل قايمة فيها.

أيسلندا تشارك السنة لأول مرة في تاريخها و كانت في المربع الذهبي متاع يورو 2016 .. أيسلندا هي مجموعة من الجزر ما يتجاوزش عدد سكانها 300 ألف أما نلاحظو إنو معدلات الإنجاب فيها ارتفعت ب20% في التسعة شهور الأخرين، دليل على السعادة إلي يعيشها الشعب الأيسلندي، أما ربي يستر السنة كان يعملوا حاجة باهية في المونديال ترسيلهمش يكريو في جزر ما الدنمارك و السويد باش يلقاو وين يعيشوا .. هههههه …

كرواتيا فريق ذو تقاليد كروية و كانت أفضل نتيجة ليه عام 98 كيف أحرز المركز الثالث عالميا.

نيجيريا سادس مرة في المونديال و رابع مرة تطيح في نفس المجموعة مع الأرجنتين .. أحسن نتايجو كانت ثمن النهائي أعوام 94، 98 و 2014.

الأرجنتين خليناها للآخر أما من الواضح إنها شتحضى بأكبر حظ للتأهل، بل من أكبر المرشحين للكاس أصلا رغم خسارتها مؤخرا في 2 متشوات ودية بنتائج أليمة مع نيجيريا 4-2، و مع إسبانيا 6-1.

مونديال السنة يمكن يكون آخر فرصة لليونال ميسي باش يضم اللقب الوحيد إلي قعد ناقصو قبل الاعتزال و يهز مع بلادو كاس العالم.

ستناونا المرة الجاي باش نحكيولكم على فرق نارية تحبس الأنفاس في المجموعتين E و F.