بما أنو الأحزاب كثرت و المرشحين للرئاسة زادا كثرو، قررت مجموعة من الشبان، اللي هوما محمد غديرة (25 سنة، طبيب مقيم في التخدير و الإنعاش)، أحمد لوكيل (23 سنة، طالب بمرحلة الماجيستير إختصاص تواصل سياسي و مؤسساتي)، سارة الزين (23 سنة، طالبة اقتصاد و حقوق) و حمزة بن خضر (20 سنة، طالب طب)، إنها تقوم بمبادرة بعنوان « شنوة برنامجك؟ » تسهل على المواطن التونسي الإختيار في الإنتخابات الرئاسية.

المبادرة تتمثل في موقع واب باللغتين العربية و الفرنسية، نلقاو فيه تعريف بأسبابها و أهدافها كيما نلقاو فيه 3 أقسام أساسية :

أول قسم بعنوان « اكتشف المترشحين » فيه قائمة بأسماء المرشحين للإنتخابات الرئاسية و أجوبتهم على أسئلة الفريق المشرف على الموقع، و الأسئلة هذي تشمل المجالات التالية : السياسة، المجتمع، الأمن و الدفاع، الإقتصاد، العدالة، التربية، الصحة، المحيط، النقل و الشؤون الخارجية. و بما أنو الموقع هذا يلم برامج المرشحين الكل في بلاصة واحدة فإنو يسهل على المواطن النفاذ للمعلومة.

ثاني قسم بعنوان « قارن المترشحين » و هو قسم مخصص للمقارنة بين البرامج الإنتخابية. تختار زوز مرشحين من القائمة الموجودة بالموقع، فيتم عرض أجوبة كل مرشح منهم على نفس السؤال و بالتالي يكون الموقع بسط المعلومة للمواطن و سهل عليه عملية المقارنة.

ثالث قسم هو « الرئاسية Quizz » و فيه تنجم تجاوب على الأسئلة اللي اطرحت على المرشحين. كيف تكمل الموقع يقوم بالحسابات اللازمة و حسب أجوبتك يعطيك أكثر 3 مرشحين كانت أجوبتهم موافقة لأجوبتك عامة و أيضا في كل ميدان على حدى. تنجم زادا تحمل ملف الcode source اللي حسبو بيه نقاط كل مرشح في الQuizz.

و رغم أنو كان فما تجاوب من قبل 14 مرشح، إلا أنو نلقاو 12 مرشح برنامجهم الإنتخابي مازال مش موجود في الموقع، و اللي هوما عبير موسي، سليم الرياحي، قيس سعيد، عبد الفتاح مورو، عبيد البريكي، حمادي الجبالي، حاتم بولبيار، محمد الصغير النوري، محمد الهاشمي الحامدي، منصف المرزوقي، الصافي سعيد و سيف الدين مخلوف.

لللإطلاع على محتوى الموقع أو الإتصال بالفريق العامل هذا هو رابط الموقع : chnowabarnemjek.tn

صورة تجمع محمد، أحمد، سارة و حمزة