كي نسمع الهند يجي في بالي بوليود والأفلام متاعهم عرس 7 أيام كاملة يعديوها يشطحو ويغنيو عادي فيلم كامل يتعدا أكاكا وديما البطل قتلولو بوه و يحب ينتقم. أما اليوم مش بش نحكي على بوليود الخبراء حاطين الهند بش اطيّح امريكا وتتنافس مع الصين على أقوى اقتصاد في العالم 2050 والتوقعات هاذي مش جاية مالحيط أما من خدمة بدات من 2014.

نبداو ماللول.

تعد جمهورية الهند الثانية في الترتيب من حيث عدد السكان ب1,3 مليار ساكن وفي حلول عام 2024 بش تفوت الصين وتولي 1,44 مليار ساكن.

والحاجة إلي تعجب هي أنو السكان بش يكونوا أكثرهم شباب معناها العباد إلي تخدم بش تكون أكثر من إلي ما يخدموش في 2050 التوقعات تقول أنو بش يوليو  1,1 مليار عامل ومعدل أعمار السكان 27,3.

بخلاف هذا الهند تعد سابع أقوى اقتصاد في العالم و الثالثة في القوة الشرائية وحاطينها بش تحقق نمو اقتصادي ب 7,4 وتفوت الصين.

رجل المرحلة

ناريندرا مودي هو رئيس الوزراء متاع الهند من 2014 حتى التوا، مهمتو هي تحقيق النمو يجيب الاستثمار و يخلق مواطن شغل ويحول الهند لقوة اقتصادية قادرت تنافس امريكا والصين اقتصاديا، سياسيا، و عسكريا  مسوؤلية كبيرة ياسر تعطات لمودي اما السؤال هو شكون هذا ومنين جا وشنوا الي خلاه هكا؟

الحاجة الي خلات الهند لكل تختار مودي وتساندو، هي انوا هو مش رجل سياسة كلاسيكي. مودي جاي من عايلة فقيرة وكي كان صغير كان يبيع في التاي مع بوه في محطة التران. من 2001 لـ2014 ولمدة 13 سنة، مودي كان الحاكم متاع ولاية غوجارات  الي فاها 65 مليون ساكن الي حققت نمو بـ%10.

 وهذا الشي الي لفت الانظار ليه.

في الحملة الانتخابية متاعوا وعد انوا يطبق النمو هاذا على الهند الكل واكثر من هذا وعد انوا يحققوا في 10 سنين بركا وهذا الي خلاه يربح في 2014 باغلبية ساحقة مشهدتهاش الهند من 30 سنا.

العوائق و الامر الواقع

كان لاحظتوا من لول و انا نقول الخبراء يتوقعوا و الكلام الكل توقعات ممكن تصير وممكن لا .في الوقت الحالي الهند عندها برشا مشاكل.

أول حاجة بلاد تحب تطور لازمها تشجع الاستثمار في الحالة متاعنا، الهند تحتل المرتبة 130 في التسهيلات متاع الاستثمار والاوراق الادارية الي هي كارثة كبيرة واكثر من هكا الضرائب على السلع ؛ مثال باكو بسكوي اذا كان بشكلاطا تخلص عليه سوم واذا كان بلاش تخلص سوم اخر. نعرف حاجة تضحك اما هذا الواقع وبش توصل السلعة  تتعطل ياسر وممكن تضيع  لدرجة انك تجيب سلعة مالبرة أسهل من انك تعاداها من ولاية لولاية منحكيوش عاد عالبنية التحتية واكا التصويرة الشهيرة متاع التران في الهند.

الهند معروفة بالفساد برشا ؛ مثال شطر المساعدات متوصلش لناس الفقراء و يفكوها الناس الفاسدة. بش يكافح الفساد قرر مودي انوا يسحب الفلوس فئة 1000 روبل و 500 روبل و يبدلهم الي هوما يمثلوا 80% من الفلوس الموجودة الي عمل ازمة مالية في الهند البنوك معندهاش فلوس بش تبدل للمواطنين، وهذا الي خلا صادرات البلاد تتراجع ورجال الاعمال معادش ينجموا يخلصوا العمال.

حاجة اخرى عادي في الهند يقدموا 25 مليون شخص وهوما طالبين 90 الف بركا مثال في كونكور الشرطة متاع مومباي قدموا 200 الف وقبلوا الف و 300 برك.

الاصلاحات

مودي مقعدش يتفرج عمل لجنة هي الي تقرر اناهم  القوانين الي لازم يتناحاو والي لازم يبقاو  لحد توا فما الف و700 قانون نحاواه.

عمل قوانين لمكافحة الفساد وسهل في الاجراءات متاع الاستثمار وشجع الشركات الاجنبية يخي هبطت للمرتبة 100 في سهولة اجراءات الاستثمار.

ولقا حل زادت للازمة متاع الاموال عمل خطة تسمح لناس بانهم يملكوا حساب بنكي لاول مرة ورقم كان مهول 200 مليون مواطن سجل في الخدمة هذي لاول مرة وعملوا حساب بنكي.

مودي شاف حكاية الضرائب على السلع  وكثرتها معندهاش فايدة يخي نقص فيهم وزيد وعد بش يصرف اكثر على البنية التحتية ووعد بش يصرف على السكك الحديدية 130 مليار منا ل 2020.

مودي في ظرف 4 سنين عمل برشا اصلاحات ونتائجها بش تكون على المدى الطويل  وحسن برشا في الهند ووعد المواطنين بانوا القرن 21 بش يشهد سيطرتهم و نفوذهم عالعالم والاقتصاد متاعهم ماشي ويطلع والمؤشرات لكل معاهم لكن، الهند مشاكلها برشا ولازم برشا وقت بش تتحل.

السؤال الي يتطرح هو انوا مودي بش يكون قادر انو يوفي بالوعود متاعوا في المدة الي حددها؟