لكلنا نتبعوا في الاحتجاجات النهارين هاذم بعد غلاء الأسعار و الحالة الاقتصادية المكربة الي عايشين فيها ، وبحكم الخبرة الثورية اللي ولات عندنا كشعب باك +7 ثورة اختصاص اعتصام سلمي و حرق. لذا فاليوم باش نعطيوا شوية نصائح للطبقة السياسية و ‘النخبة’ متاعنا عل و عسى يتعلمو كيفاش يتعاملو مع الشعب الي ما عادش باش يتعدى عليه التفليم و الرويق متاع العادة

1- أول حاجة و قبل كل شيء فما معجم خايب برشا يستعملوه الحكام ننصحكم ابعدو عليه من قبيل ‘ملثمين’ و ‘عصابات ‘ و ‘مجرمين ‘ كلنا نعرفو إنو الحرق و التخريب مرفوض و اللي يعملو فيه هوما مجرد استغلاليين يحبو ينطروا شوية مصروف على حساب سلمية الاحتجاجات لذا فخلينا نتفاهمو إنو الناس الكل ضد التخريب ( أو علي الأقل العباد اللي تحب الخير للبلاد ) فكيف يسألوكم على الاحتجاجات ما تاكلوناش بلغة التخريب و تنسيونا في القضية الصحيحة

 2- ثاني حاجة، بربي بربي ماتدعيوش للحوار.. تحاورنا بما فيه الكفاية ما عادش حاشتنا بضربان المجدق و الوعود الشعب يحب أفعال، يحب أكثر من مجرد كلام

3- ثالث حاجة للعباد اللي تحكم فعليا و للجماعة الي ساق في الحكم ساق في المعارضة .. كونوا على مبدأ موش حزبك يحكم و يصادق على قانون المالية بعد تخرج تقول أنا نرفض غلاء الأسعار و عامل روحك متفاجئ و ثورجي .. و زادة ما تجيش تقول الوضعية الاقتصادية تراكمات السبب فيها الاحزاب اللي حكمت قبل و انت حكومتك شطرها منهم؛ لا نحبك لانصبر عليك

4-رابعا، الوضعية الاقتصادية صعيبة و الضغوطات الخارجية أصعب و أصعب و القروض لازم تخلص و الموازنة الاقتصادية مختلة .. هذا الكل متفاهمين عليه أما غلاء المعيشة هذا الكل موش مبرر .. يعني اذا كان انت مكش قادر انك تحسن الوضعية الاقتصادية و تدور الدولاب و ما عندك كان التقشف حل ابدا مالفوق و انت هابط؛ أكثر حاجة ما حبوش يفهموها العباد اللي تحكم انو التونسي البسيط ( الي هو أغلبية ) كي يتمس في خبزتو ما يسكتش خاصة كي يشوف الظلم الطبقي متغلغل و كي تجي تجوعو بعد تروح في مرسداس للقصر متاعك و تحبو ياقف لاقتصاد تونس وقتها يثور عليك و على اقتصادك .. تونس بلاد ما تنجمش تكون رأسمالية فاحشة و الدولة باش تنجح و تستقر لازم تكون في صف المواطن البسيط بالفعل

5- عزيزتي المعارضة صدقوني الاحتجاجات راهي ما خرجتش بدعوة منكم و لا علاقة بيكم و راهو الشباب المحتج موش كلو رفاق و مناضلين و رويق ثورجي بل بالعكس هاذي عباد فادة مالخطابات الشعبوية و اللي متوصل لشيء و مستاءة مالطبقة السياسية ككل، لذا فالركوب المجاني علي الاحتجاجات ما ينجم كان يعقد الأمور خاصة و انو واحد من قياداتكم هو رئيس لجنة المالية اللي عمل قانون المالية

6- كان تخمموا في شوية قمع و تخويف و تسخايلو الشيء هذا باش يوصل راكم تحلمو و كان باش تحطوا الأمن في الواجهة تذكروا راكم تلعبو في لعبة ماسطة مع شعب محنك في أمور اعتصامات و احتجاجات

7- الإعلام و ما أدراك مالاعلام .. التونسي ما يحس بلحق بضرورة الاحتجاج كان ما يحل التلفزة و يسمع بارشا كذب و تهويل و تجريم و بلادنا جوها باهي و السماء زرقاء و العصافير تزقزق لذا فسكتوا علينا أبواقكم

8- ما زلنا بعد الثورة بسنين ما لقيناش بديل مقنع ينجم التونسي يعطي فيه ثقتو باش يطور البلاد خاصة اقتصاديا تقريبا كل الاحزاب ما عندها حتى مخطط واقعي و مثمر .. لكلها تحكي و تمني و الصحيح يجيبو ربي .. حاشتنا بشكون يبني و يقدم مشاريع مستقبلية للشباب و تعطيه فرصتو ، الحل في الدماغات الجديدة موش في الشياب البعاد على القرن الواحد و العشرين

في الاخر نزيد نذكر إنو شوية مالحنة و شوية من رطابة اليدين .. أحنا زادة كمجتمع رغم إنو ثورتنا الوحيدة اللي نجحت في المنطقة و إنو برشا نجاحات أمنية و ديمقراطية صارت أما ما زلنا بعاد على عقلية العمل و التطور و ما زالت عنا ممارسات غير حضارية و ما زلنا نحبو الفصعة و الراحة و الإضراب العشوائي و مازلنا للأسف نخمموا كان في رواحنا ….و عاشت تونس حرة ديمقراطية