السلام عليكم 😊 ❤

اليوم باش نحكيلكم على المعهد العالي للعلوم التطبيقية و التكنولوجيا بقابس ( ISSAT GABES )، و الي يحتوي على اختصاص المرحلة التحضيرية مع بقية الشعب.

باش نعطيكم نظرة شاملة على المعهد مبعد نحكيلكم على الاختصاصات.

المعهد مقسم إلى جزئين اثنين، جزء لطلبة المرحلة التحضيرية و جزء لطلبة نظام امد ( LMD ) لكن المدخل واحد و عنا مشرب (Buvette) مشتركة .. يعني هو عبارة على معهد واحد، لكن فما جزء يقروا فيه البريبا و جزء لنظام امد و حاليا وقع التوسيع في المعهد.

عنا باب يحل على المدرسة الوطنية للمهندسين بقابس ENIG يعني نتوسعوا على بعضنا 😛 ساعات طلبة المعهد يقروا في مدرسة المهندسين و ساعات طلبة البريبا يقروا في جزء نظام امد و العكس صحيح ..

فما جردة ( Jardin ) في الجزء المخصص لطلبة الLMD، فيها اشجار وارفة الظلال 😛 نتبردوا فيها كيف يسخن الطقس 😛

موجودة في حي جامعي، و المبيتات قراب بحذاها سواء كانت حكومية و الا خاصة، و الاستوديوهات و شقق الكراء موجودة مفروشة و غير مفروشة. المطاعم تعد تغلط و المقاهي بين القهوة و القهوة تلقى قهوة .. ما هيش بعيدة على المركب الجامعي (تصير فيه نشاطات مختلفة) و فما قاعات رياضة زادا .. المعهد قريب من المعهد العالي للعلوم القانونية بقابس ISSJG مسافة 10دق ..وقريب زادا من كلية العلوم بقابس FSG مسافة 20دق تقريبا .. المطعم الجامعي قريب مسافة 15دق من المعهد و موجود حذا كلية العلوم… النقل متوفر سواء كان تاكسيات و الا حافلات النقل(الكيران) و المحطة قدام المعهد مباشرة..

توا نحكيلكم على الاختصاصات. الاختصاصات الموجودة في هذا المعهد:

* بالنسبة لنظام امد Cycle LMD :

– Génie Électromécanique اجازة تطبيقية في الالكتروميكانيك

– Génie Civil اجازة تطبيقية في الهندسة المدنية

– Chimie Industrielle et procède اجازة تطبيقية في الكيمياء

– Génie de procédure اجازة اساسية في هندسة الاساليب

– Master Professionnelle :

– Master Électromécanique

– Master Génie Civil

– Master Chimie Industrielle et procède

* بالنسبة للمرحلة التحضيرية Cycle PREPARATOIRE :

– مرحلة تحضيرية علمية MP ou PC

– مرحلة تحضيرية تقنية PT ( تسكرت بالنسبة لجماعة 2ème tour )

– مرحلة تحضيرية بيولوجيا جيولوجيا BG

بالنسبة لسكور الشعب هذي في ISSAT Gabès تلقاوه في الصفحة 43، 45 و 46 من دليل التوجيه الجامعي (الدورة الثانية).

و مرحبا بيكم 😊

بقلم ابراهيم الخليل بن صغير