قالولي مدة و تتعدى …
قالولي مدة، وقت و الوقت يمشي، يجري هو عدوا وفا … و زعمة وفا ؟
اليوما نحب نكتب و نحكيلكم على عام و ستة شهور من حياتي، 13140 ساعة، 788400دقيقة و 47304000 ثانية …
برشا وقت ؟
برشا ماهو … أما تعرفوا شنية ألي كان أكبر منهم الكل …
هو النفس ألي رعش، تنهد، تخنق، تحبس و تسيب …
النفس ألي لعبوا بيه في كل السوايع ، الدقايق و الثواني …
مانيش بش نكذب عليكم و نقلكم تعدى و وفا الوقت تعدى أما كان صعيب و صعيب ياسر …
الوقت تعدا و هز معاه الليالي ألي ما جنيش فيهم النوم، هز معاه دموعي و ضحكاتي ألي مش مالقلب …
هز معاه كذباتي و كلماتي لاباس هاني ساتنست …
هز معاه النفس متاعي المخنوق …
أي كان فما برشا هواء و البيبان محلولة، أما مافماش نفس فما تنفس …
خاطر ماكنتش في بلاصتك …
تغرزرها من بعيد ماهاش بلاصتك تحاول تقرب، تحاول تنسى أما حد ميخليك لا تنسى ولا تستانس …
بالكلمة اللولة ألي توجعك، و الثانية ألي تعمل روحك مسمعتش، و بعد تقول عادي مدة و تتعدا و محبتش تتعدا، الدموع شاحوا و أكل الغصة مازالت …
مازالت تحب تصيح و تقول ماهاش بلاصتي والله لاهي بلاصتي …
أما الوقت تعدا و هز معاه كل شيئ، خلالي عباد ما أحلاهم، عباد نعرفهم و عباد عرفتهم، نحبهم وزدت حيبتهم …
نكتب في الكلام هذايا ليكم ليكم إنتوما،
للعباد ألي راوني من غير ماسك،
للعباد رات دموعي و مسحتها،
للعباد ألي كي يسمعوا كلمة توجعني يجاوبي قبلي،
للعباد ألي خلاوني نضحك من قلبي في وقت كان صعيب برشا،
للعباد ألي خلاوني نتقبل و نحب البلاصة ألي كانت مفروضة عليًا،
ليكم الكل …
و نكتب في الكلام هذا و دموعي شاهدة على قداه نحب، و قداه صعيبة أني نفارق برشا فيكم …
ليكم الكل نحب نقول لكل واحد فيكم يعيشك خاطر أنتوما ألي خليتوا الوقت يتعادا و خليتوا مني عبد آخر، منكذبش عليكم عبد هذا فخورة بيه …
اليوما و عدي بش نبدا حاجة جديدة في حياتي …
صحيح توا نحس في فراغ، صحيح وجعني البعد على حياتي أكثر ، أما 13140 ساعة، 788400دقيقة و47304000 ثانية أكل برشا وقت خلاني نؤمن ألي الدنيا مزيانة مزيانة برشا ..
صحيح الوقت هذاكا خذالي حاجات، حرمني … أما عطاني عباد بالدنيا، خلاني نحس أقوى و أزين متنجم متحس في حياتك ؛
أنك تريسكي، أنك تخاف، أنك تصدم، أنك تثق، أنك تحب و تتحب …
حطوا في بالكم ألي كل حاجة تصيرلكم ليها سبب،
و عمرك لا تقول مستحيل خاطر يجي نهار إنك تعمل الحاجة المستحيلة هذيكا حلك الوحيد …
و نقلكم حاجة
في بالكم إلي راكم الحب بكلوا ؟
حطوها في بالكم و خليوها معاكم وين تمشيوا…
أني أهًيا في قلبي ..
Share your thoughts