اعرف تتسامح مع روحك !

اعرف ادور ظهرك وتمشي في موقف يقللك من قيمتك و الا من احترامك ..

اعرف قول لا للحاجات إلي متناسبكش والي تجي ضد مبادءك ..

صدقني في وقت الغصرة، كي تظلام الدنيا قدام عينيك و البلايص عليك تضياق، كعبة كعبتين كهو الي ممكن يساندوك و يحطوك في عينيهم.

متعطيش لعبد قيمة أكثر من القيمة الي هو عطاهالك، بش ميدورش بيك الوقت و تقول ‘مكارنيش .. يا ليتني’.

صحيح يجي وقت تضعف، تتقلق، تفد،تتوجع،تغرق في همومك، تكثر عليك المشاكل و تفد.

نعرف مليح شمعناها، نعرف الوجيعة الي تحس بيها وقتلي راسك يتحط على المخدة باش ترقد و متنجمش، خاطر وقتها حتى نوم معناه يتبدل.

معادش ترقد باش تقوم و تبدى نهار جديد، النوم متاعك يولي وسيلة ليك بش ترتاح و تنسى، و ممكن ياسر باش تهرب من همومك.

أما كيما يقولو، ميدوم حال …

لا حزنك يدوم و لا فرحك يدوم حياة كاملة ..

دنيا هاذي مزيج بين دمعة و تبسيمة

بين ربح و خسارة

بين تنهيدة و ضحكة تملى الدار

بين غصرة و لمة مع لحباب

بين عباد يهزوك لفوق و يدخلولك فرحة لحياتك

و عباد تكرهك في الصحبة و في المعارف ..

بش تخسر برشة عباد

و بش تتعرف على برشة عباد

عباد بش يقعدولك في الذاكرة متاعك و يكونولك درس

و آخرين بش يشدو فيك صحيح و يكملو معاك الثنية للخر ..

المفيد في هذا كلو انك متخسرش روحك !

متستسلمش و ماتيأسش !

أمن بروحك، بأحلامك، بطموحك ..

اخسر و افشل مرة و ثنين و ثلاثة و اربعة كان لزم اما اعرف تقوم، اعرف شد صحيح بش توصل

حد مينجم يعاونك بش تختار ثنيتك، انت وحدك تنجم تختار : يا باش تقوم و تحارب و تضحي باش توصل للي تحب عليه، و إلا بش تقعد حياتك كاملة نادم على تصويرة رسمتها في مخك اما يا خسارة موصلتلهاش ..

كون رسام حياتك ! غمض عينيك و تأمل كيفاه تحبها تكون، اما الفايدة انك بعد هذا تاخو فوشة و تبدى تصور على ورقة بيضاء. أبدى أنجز، ومن حتى شي اوصل لكل شي ..

مرة و ثنين و تلاثة، تو تلاحظ إلى كل تصويرة جديدة احلى ملي قبلها ..

كل تجربة جديدة هي عبارة على جزء كان لازم تعيشو بش تشكل تصويرة حياتك.

هاكي هي الدنيا، ارسم و عاود حتى لين توصل لأزين تصويرة و تقول :هذي هي الحياة إلى حبيت عليها و تمنيتها !