كي كنت صغير حلمت بش نطير، جوانح فوق ظهري و ورد فوق شعري. حلمت بش نعوم في بحر صافي و نلبس لبسة صيافي، لبسة مزركشة كلها الوان و أشكال مبربشة. حلمت بقصر ببوش و بالالوان مطشوش، حلمت بروحي فوق القمرة نملي في الماء مالسدرة و حلمت بروحي في عز النوم نقطف في كمشة نجوم، حلمت بروحي مغروم نشطح على فزاني و مزموم، فوق وذني مشموم و ناكل في كعيبة حلقوم. حلمت بدنيا فرحانة بالزهو مليانة، توقعت العالم يكون جنة كلو أغاني و بنة، أما توا كبرت و فهمت، فهمت الي الدنيا موش هكا. قلت الحركة و زالت البركة.

نشوف في ظلام بعيد. ندور كي المهبول من بلاصة لبلاصة نلوج على النور، النور الي كنت نتمنا فيه و الضو الي كنت نحلم بيه. قعدت نلوج على مخرج، حاولت نستحضر حلمة ولا ثنين نعدي بيهم السنين. حاولت نهرب و ننسى العذاب، اما حلماتي اتدفنو تحت التراب. حرت و ما عرفتش كيفاش نخرج.

أحلام الطفولة و البراءة ماتت و مات معاها القلب الصافي و الحب الدافي. تحرقوا الكل و ماقعد منهم كان الرماد و الظلام. ظلمة تخوف قتلتني بالبرد أما ذكرتني بالحرب، الحرب الي الداخل تزرعت و قوة في قلبي تولدت و حلمة جديدة تغرست بش نقاوم الظلام و نقتل الغدر و الطغيان، قررت بش ننصف المظلوم و ناقف في صفو و نعطيه حقو. وليت نحلم بدنيا كلها سلام يتقال فيها أحلى كلام، بوطن يوفى فيه القتل و تموت فيه الفتن. نحلم بدين المحبة و السلام و نأمن بيه، بضحكة اليتيم و فرحة الفقير، بدمعة تشيح و بسلاح يطيح، نتمنى الدم ماعادش يسيل و الديار ماعادش تميل، نتمنى و نتمنى..

بت في السطح الليلة، قعدت نحلم بناس فرحانين، بطفل صغير دمعتو بين خديه ماعادش يتضرب، و بمرا شعرها أطول منها ماعادش تغتصب، بناس كبار و ببيات ماعادش تحت الدمار تتفقد، ببنية صغيرة أحلامها كبيرة ماعادش تتنقب، و بعباد ألوانها و توجهاتها مختلفة و ثقافاتها على كل لون يا كريمة ماعادش تتهان و تتمارس عليها العنصرية. قبل حلمت بغبار النجوم أما تو وليت نحلم بش نوليو كلنا نجوم، حلمت بدنيا مزيانة اما تو وليت نحلم بعباد مالداخل مزيانين. حلمت بشطحة و فرحة أما تو وليت نحلم بحياة كريمة زادا.

أحلام الصغرة أحلام تظهر مستحيلة أما مافما شي مستحيل علينا… الأحلام عالم كبير و أحنا نقدرو عليه، كل واحد فينا فيه نور اسمو الحلم كان يطفى نموتو الكل. كل واحد عندو حلمة يشد فيها و يأمن بيها مهما كانت صغيرة كبيرة ولا مستحيلة، ينجم يجي نهار و تطفى الحلمة أما بش يجي نهار و تعاود شرارتها تحمى و نورها بش يهزك لأحسن بلاصة حلمت بيها. و ماتنساوش الأمل و التفاؤل أحسن طريقة بش تقعدو تحلمو حتى أخر دقيقة..