اليوم حديثنا علينا، و هدرتنا منا و فينا، حديثنا على الحيوط المسخة و الطواول المفسدة و القاعة المزرزقة و الكواغط المطيشة و على البلايص الي تفحجهم بش تعفس كي تصب المطر و الأوراق المرشوقين في قلب التراكن..

الأيامات تتعدى و كل مرة نزيدو نسمعو كلمة « يا حسرة الاينسات كيفاه كانت نظيفة و جديدة »، و نزيدو نراو يدين تتمد و ترمي و تطيش و و تمر مرور الكرام قدام الأوراق المعلقة الي تمنع في الماكلة وسط ال amphi و إلي ولات تافهة و ما عندها حتى معنى من كثرة عدم احترامها لدرجة انو الصالات لكلها مسخة بالماكلة الشي الي جذب الحيوانات و على وجه الخصوص الكلاب الي ولات تدخل و توسخ و تزيد الحالة سوءا.

برشا منا زادا يتفكرو الأشهرة الي تسكرت فيهم المجموعة الصحية عمناول بالمفتاح بسبب fuite و تصليحات. الحاجة الي تخلينا لكل مش مرتاحين لا أحنا كطلبة لا الأساتذة و خاصة عملة النظافة الي يتشكاو من عدم وعي الطلبة و تعاونهم و إلي يوصيو بأنهم بلي ينظفو و يعاودو تعبهم ماشي في الريح و الوسخ فيسع ما يرجع تقول عليه ما تلمش.

شي يوجع القلب كي نراو قيمة و زين البلاصة الي الواحد يعدي فيها وقت أكثر من دارهم قاعدة تطيح، البلاصة الي متسمية كوكب الإينسات الي ندخلولها راشقين عينينا في السما و مشيعين أحلامنا ورا النجوم و هازّين روسنا للسحاب على هذاكا مذابينا وقت عينينا ماسّة طرف الدنيا نرجعو نشيعوها على هالكوكب و نشوفو آش يزيدو و آش ينقصو.

لكلنا نعرفو الطلعات و الهبطات إلي مر بيهم المعهد الفترة الاخرة و لكلنا نعرفو إلي بطريقة أو بأخرى تصرفاتنا أحنا زادا تتأثر أما أهم حاجة لازمها تكون في سلم أولوياتنا كطلبة هي نظافة الإينسات، نظافة القاعة إلي نتكاو و نضحكو عليها، بين الكراسي إلي أحلامنا تكبر فيهم، تحت الطواول إلي يشهدو على الغصرات، و حتى المجموعة الصحية، على خاتر اليد إلي ترمي و تطيش تنجم زادا تنظف و تبني و تعلّي و على خاتر الدار داركم…