Iron man « منقذ البشرية »

اليوم بش نحكيو على أكثر إنسان قاعد يفيد في البشرية في وقتنا الحالي و يخمم في المستقبل متاعنا ومتاع الأجيال القادمة، اليوم بش نحكي على »the real life tony stark » البليونار الي عندوا الفلوس وكل شيء لكنوا مغروم بالتكنولوجيا ويحب يغير في العالم و يحسن فيه، اليوم بش نحكي على « Elon Musk ».

السيد هاذا لازم العباد الكل تكون تعرفوا ولازم يكون قدوة للشباب الكل،  بخلاف هاذا بالنسبة  للعباد الي عندها مشاكل في الوقت و تقول وقتي ضايع و النهار يتعدى ومنعمل فيه شي السيد هذا نجموا نتعلموا منو تنظيم الوقت.

رجال الأعمال النهار متاعهم معبي و يبداوالخدمة مالخمسة متاع الصباح نهار كامل يبداو يجريو بش شركة متاعهم متضيعش و تكبر وباقي ميخلطوش أما الشيء إلي يبهت هو أنو  ايلون ماسك عندو زوز شركات والزوز ناجحين و يدخلوا فل الفلوس.

نبداو مالول، ايلون ماسك مولود في جنوب إفريقيا عام 71،  كي كان عمرو 12 علم روحوا البرمجة و صنع أول تطبيق وباعوا بـ500 دولار. تصور طفل عمره 12 فيديه 500 دولار هذا إلي خلاه يفهم الدنيا مالصغرة وأنوا مش لازم تكون موظف وعندك شهادة بش تدخل فلوس.

الصغار الكل في عمرو يلعبوا في الشارع أما ايلون كان يعدي وقتوا فالمكتبة يقرى في الروايات و كتب الخيال العلمي. ايلون بدى يحلم أنوا يمشي للفضاء و الفكرة بدات تكبر في مخو لكن  بعد مدة أمه وبوه طلقوا أمه مشات للكندا وهو وخوه قعدوا مع بوهم في جنوب إفريقيا، كي وصل 18 مشى بحذا أمو قرا فيزيك و إقتصاد أما حس أنه اهتمامه مش غادي في الوقت أذاكا الانترنات مزالت مش معروفة و منتشرة كيما توا إلا أنوا قرر يخوض المغامرة هاذي خرج مالقراية لا خدمة لا فلوس لا حتى شي بش يتبع غرامو.

البداية كانت لهنا خذا قرض من عند بوه و حل مع خوه أول شركة زيب 2 « zip 2 » الي باعها مبعد بـ300 مليون دولار. ماسك مكسرش الفلوس متاعوا زاد إستثمرهم  في شركة أخرى إلي هي بايبال « PayPal » إي نعم الشركة هاذي بداها إيلون ماسك وين المعاملات الرقمية مزالت منتشرتش ولعباد خايفة على فلوسها إيلون نجح أنوا يوصل الشركة متاعوا للبليون دولار.

في 2002 بايبال شراتها إيباي بـ1.5 بليون دولار، الفلوس مخلاتوش ينسى الحلم متاعوا أنو يمشي للفضاء ويشوف لكواكب لخرى مشى لموسكو بش يشري صاروخ يخي ضحكوا عليه و طلبوا منوا برشا فلوس بش يعجزوه عمل حساباتو ياخي لقى أنوا الصاروخ يتكلف أقل ببرشا مالفلوس إلي طلبوها منوا قال بش نحل شركة متاع صوارخ وحدي وبالحق اِستثمر 100 مليون دولار من الباي متاعو بش يحل سبايس آكس « SpaceX » أول شركة خاصة ونزيد نركز على كلمة خاصة  متاع صناعة تكنولوجيا الفضاء و الرحلات الفضائية اليون فضلوا من الباي متاعوا 70 مليون دولار مشراش باها بوغاتي ولا جزيرة مشى اِستثمرها في صناعة الكراهب إلي يمشيو بالضو وسماها تيسلا « Tesla ».

6 سنين والصواريخ إلي يبعثهم يا يتكسروا يا يطيحوا قبل ميوصلوا وصل يتسلف فلوس من عند صحابوا بش يكمل مشروعوا برغم هذا لكل ما سلمش علا خاتر من صغرو ديما حاط روحوا في الريسك و تحول من مليونار لانسان فالس صاحب مشرو ع مش ناجح بعد فشل 3 محاولات، لولا دبر فلوس تكفي بش يبعث صاروخ آخر أكاهو كان يفشل يسكر الشركة لكن المفاجاة كانت أنو المحاولة نجحت و الشركة نجحت في أنها تكون أول شركة خاصة الصاروخ متاعها يوصل للفضاء وأكثر من هكا الصاروخ متاعهم مبرمجينوا بش يرجع للأرض و يستعملوه مرة أخرى.

بعد الإنجاز هذا،  البيبان تحلت في وجه إيلون، ناسا صححت كونترا معاه ب1.6 بليون دولار وهكا أحلام إيلون ماشية وتتحقق وأهدافو كبرت. إيلون مبرمج في 2024 بش يبعث صاروخ لمارس والنجاح متاعو موقفش لنا شركة إيلون لخرى تيسلا في 10 سنين أحدثت ثورة في صناعة السيارات الكهربائية كراهبها من أسرع و أكثر الكراهب أمان إلي تخدم بالضو في العالم.

نجاح إيلون مجاش بالساهل جا بعد خدمة وتعب كبير، إيلون يخدم في 100 ساعة في جمعة عندوا 5 صغار و عندو زوز شركات في نفس الوقت كي سئلوه قالولوا علاه رفضت حياة المليونارات و البذخ قال أنا غايتي مش المال وإلا السلطة وإلا القوة أنا كنت طفل صغير حلمو أنو يمشي للفضاء و تبعت حلمي آمنت بنفسي وبقدراتي ومكذبتش أحلامي حبيت نغير في العالم ضحكو عليا المهندسين كي حبيت نشري صاروخ، ضحكوا عليا كي خرجت مالقراية أما أنا كنت نغزر الفوق في النجوم وين حلمي موجود.