كل مرّة تصير أزمة في هالبلاد إلا و نزيد نتأكد أنها تونس كدولة تكوّر في رابطة الهواة. بكلنا تفجعنا بتصاور الدّمّار إللّي خلفتو الأمطار في نابل و ضواحيها، و بكلنا تأثرنا كي شفنا العايلات ما لقات وين تبات و الأرزاق تقطعت … أما الشّي إلّي يكوخر هو تصريحات المسؤولين، حاجة تحسّسك انو بلادنا شادينها جماعة هواة و ماعنّاش سياسات اتصالية و لا تصريحات رسمية .. عنا مسؤولين يحكيو تقول قاعدين في قهوة !

نبداو بالمتألقة والية نابل، اللّي خرجت في أخبار الثّمنية و بكل بساطة قاتلهم مفمّا شيء و معنّاش خسائر و جونا احلى جو. ناقص كان باش تقلّهم أنو المواطنين إستبشروا بالغيث النّافع، و نخمّموا نحتضنوا كأس العالم في رياضة الكاياك بعد نزول الأودية، و نولّيو قطب رياضي و سياحي و الحمد لله !

فما زادا معتمد عطا أكثر إجابة حرفيّة في العالم. كي سألتو المذيعة شنوّا باش تعملو كان تعاود تصبّ المطر، قلّها – و بكل ثقة في النّفس – « هانا حالّين عينينا » .. ماو قلّك كي تبدا حالل عينيك و مركّز متصبش المطر و الأمور تمشي عال العال !

مغير منحكيو علي الوزير اللي قلهم عندها 300 سنة مصبتش مطر كي هكة. يعني في العالم كامل تجي الفياضانات و الديار تغرق و تبدى الدّولة حاضرة باش تصلّح و تعوض، كان في تونس يحسّسوك أنو المطر جات في قالب غدرة…

بلاهي على ذكر الدولة، موش عنا رئيس إنتخبناه لازمو ياقف حتى بكلمتين مع الشعب، و إلا هاوكا يوسف مشا و عمل تصيورتين باهيين… يزي فيه البركة؟!

و قبل منكمل، عجبتني وكالة الرّصد الجوّي مهبّطة على الفايسبوك نهار الفيضانات « إمكانية هطول أمطار قياسيّة  » و العباد تعلق « ربي يقدر الخير » و الوكالة تجاوب فيهم « آمين »… مالا كي هي لحكاية بقدرة ربّي علاه تعبو في رواحكم شدّو دياركم و كل يوم واحد يخرج يقلنا راهو الله أعلم شنوة الطّقس و يختم بشويا دعاء و ذكر و السّلام!