عالسلامة، باش نحكيلكم على المعهد العالي للدراسات التطبيقية في الانسانيات بزغوان، اللي موجود كيفو زادة في تونس، الكاف، المهدية، و غيرهم …

المعهد هذا تقرى فيه 3 سنين و تتخرج عندك اجازة تطبيقية في وحدة من ثلاث شعب : الفرنسية، الانقلزية ( و فما انقلزية اعمال زادة )، و الشعبة الاخيرة هي شعبة التربية و التعليم اللي باش نتوسع فاها شوية خاطرني طالبة في الشعبة هذه.

شعبة التربية و التعليم في زغوان سكورها طالع شوية و مستوى الطلبة في المعهد محترم. بعد مايقبلوك تمشي تعدي Test في المعهد يقيموك فيه لجنة تتكون من متفقدين و اساتذة جامعيين : يسالوك اسئلة حول الثقافة العامة و تكون عندها صلة بالتعليم، مثال: دور المعلم، صفات المعلم، اسئلة حول قواعد اللغة، الخ … و الTest  يكون باللغة العربية والفرنسية.

باهي باش نكونو واضحين، الشعبة هذه ماهيش هي ترشيح المعلمين سابقا، علاش؟ خاطر قبل كانو يقراو كان عامين و يخرجو برتبة معلم، اما توة تقرى 3 سنين و تتخرج عندك الاجازة التطبيقية في التربية والتعليم و برتبة استاذ مدارس ابتدائية.

بالنسبة لبرنامج القراية في الشعبة، لازمها طالب يكون عندو حد ادنى من التكوين في اللغات و المواد الأدبية و المواد العلمية زادة، على خاطر نقراو بارشا مواد و تتراوح بين ماهو ادبي و ماهو علمي وبنفس الضوارب. خلال 3 سنين اللي باش تعديوهم في المعهد هذا، هاو كيفاش باش تكون القراية :

-العام الاول : نقراو اللغات، :Maths، Physique، علوم الحياة و الارض، علم نفس نمو الطفل، الموسيقى، الفلسفة، الخط العربي، التشكيلية، التاريخ، الاعلامية …

-العام الثاني : المواد تنقص و تولي تعليمية، شماعناها؟ يعني تقرى كيفاش لازم تقري المادة، مثال كيفاش تقري العربية الخ … واللي ينزاد في العام هذا هو التربص الميداني، عنا 5اسابيع في العام مقسمين و نتربصو في المعتمدية الي نحبو علاها صحبة منفقد العربية و الفرنسية و نقريو فيهم و يقيمونا المؤطرين متاعنا.

-العام الثالث : تنقص المواد و يتم التركيز على ماهو تطبيقي، فما زيادة في ساعات التربص و المواد يكون فيها جانب تطبيقي اكثر من الجانب النظري.

بالنسبة لنظام الامتحانات، 10% من العدد تكون على الشفاهي، 20% على امتحان مكتوب (DS)، و 70% على Examen آخر السداسية، و يكون موحد في كافة المعهد. عندنا عدد اقصائي زادة (note éliminatoire) الي هو 8، يعني تجبيب اقل من 8 بين وحدة اللغات ( الفرنسية،الانقلزية ،العربية) او وحدة العلوم (مات،فيزيك…) اطيح control ( و 8 في كل سداسية مش في العام ).

افاق الشعبة : الانتداب الالي، يعني ان شاء الله دوب ما تكمل يعيطولك تخدم، و فما وعود في امكانية انهم يحلولنا الماجستير.

بالنسبة لscore الشعبة هذي، تلقاوه في الصّفحة 39 من دليل التوجيه الجامعي 2018 و ان شاء الله ربي يوفقكم.