كلية العلوم القانونية و الإجتماعية و السياسية بتونس، العالم الصغير، شنوة هي و بشنوة تتميز ..

معروف اسمها الjuridique، أو كلية 10 ديسمبر نسبة لمحطة المترو، و معروف إنو قرايتها صعيبة زعما علاش؟ .. على خاطر الكلية هاذي خرّجت برشا وجوه إعلامية كيما حمزة البلومي، مايا قصوري، و الكاتب حمادي الخليفي و غيرهم .. هي كلية النخبة على خاطر أغلب اللي يمشولها  هوما المتفوقين في شعبة الآداب، و لكن هذا لا يمنع انو فما طلبة متفوقين من شعب أخرى، فما الscientifique و الéconomiste.

بالنسبة لscore عمناول ( تلقاوه في الصفحة 40 من دليل التوجيه الجامعي 2018 ) :

* الإجازة الأساسية :

باكلوريا آداب 121،25

بكالوريا اقتصاد و تصرف 117

بكالوريا أخرى 141،69

* الإجازة التطبيقية :

بكالوريا آداب 104،58

بكالوريا اقتصاد و تصرف 102،21

بكالوريا أخرى : 127،94

ساحتها صغيرة برشا و الطلبة عددهم صغير، يعني تنجم تعرفهم الكل في ظرف نهارين. معروفة زادة بنظامها الصعيب، الcours على شكل محاضرات نهارين في الجمعة، و باقي الأيام حصص دروس موجهة (TD) للمنهجية، و الحضور إجباري على خاطر ثلاث غيابات تتسبب في انك ماتعديش الmatière. في الfaculté هاذي فما bureau صغير، تاخو منه cahier de TD من خلال carte de TD ( الي لازمك تحافظ عليها، كان تضيع ماعادش تنجم تاخو carte أخرى ).

ال cahier de TD فيه أسماء مراجع، مقالات و نصوص فقهية و في آخرها تمرين، و بالطبيعة لازم في حصة الدروس الموجهة التمرين اذاكا تكون عملت فيه محاولة أو على الأقل خدمت منهجية البحث. للتوضيح، المقال القانوني مختلف عن بقية أنواع المقالات، يتخدم على زوز مراحل :

– منهجية البحث وهي طريقة تساعد على جمع المعلومات

– منهجية التحرير وهي طريقة تساعد  على كتابة المقال

بالنسبة للمواد الأساسية هي ضارب 4، يحسبولك 10% من العدد على المشاركة و الحضور و التفاعل في حصة الدروس الموجهة، 20% من خلال اختبار مدته نصف ساعة على الأكثر في حصة الدروس الموجهة (ينجم يكون فجئي و على أقصى تقدير زوز فروض)، و 70% من خلال امتحان نهائي مدته ثلاث ساعات، يكون الاختبار على شكل موضوع إما نظري أو تطبيقي، و تكون مُطالب بالتحرير كاملا ( فما نقاش حالي لتغيير طريقة احتساب الأعداد بالنسبة للطلبة ).

نادية بن عيسى ©

يوم الأربعاء مخصص للأنشطة الثقافية. فما برشا نوادي : نادي الإعلام القانوني، نادي القانون و الرياضة، و غيرها .. و ديما تصير ندوات يحضرو فيها ضيوف مهمين على الصعيد الوطني ( على سبيل المثال، عمناول نتفكر نادي الرياضة و القانون استدعوا أسامة ملولي و فتحي المولدي )، بخلاف الملتقيات و الندوات اللي تقوم بيها الكلية بالشراكة مع مؤسسات أخرى للتأطير و الإعلام القانوني، باش تنجم تواكب الساحة السياسية و تكونلك فرصة انك تتكون و تاخو المعلومة كاملة من مصدرها، و هكاكا تنجم تبني رأيك الخاص بيك. مثلا في القانون الجديد حول الاتجار بالأشخاص، يصير في الكلية ندوة لدراسة القانون هذاكا، شنوة باهي فيه و شنوة ناقص ..

بالنسبة ليا أنا قريت فيها عام واحد، يعني مازلت طالبة جديدة، و كانت ليا تجربة صغيرة فيها و هي اني شاركت في مسابقة مرافعات حول القانون الأساسي عدد 58 لسنة 2017 للقضاء على العنف ضد المرأة و تحصلت على المرتبة الثالثة، بخلاف اني شاركت في تنظيم تظاهرة حول القضية الفلسطينية.

الكلية هاذي السنة احتفلت بعيد ميلادها الثلاثين، احتفال حضر فيه قدماء الكلية و الطلبة الجدد و الأستاذة كأنهم عايلة وحدة .. كل عام تتفتح السنة الدراسية فيها بمحاضرة افتتاحية، عمناول قدمها العميد عياض بن عاشور. فيها برشا اساتذة معروفين و مهمين و يعتبرو قامة في القانون أمثال قيس سعيد (اللي للأسف الشديد تقاعد السنة و كان حفل تكريمه يوم السبت 7 جويلية 2018 )، سليم اللغماني ( اللي كان مرشح لعضوية المحكمة الدستورية )، إلى جانب سلسبيل القليبي و غيرهم ..

القراية فيها كيما أي قراية، تتطلب جهد و تعب .. حفاظة بذكاء مع فهم تكون نتيجتك طيبة، و ما عندهاش علاقة بالآداب لأنها تعتبر في حد ذاتها علم مستقل بذاتو ..

إذا انت مغروم بالحقوق مرحبا بيك معانا