هالأيام العينين الكل محلولة على الfestival .. لا لا ماناش نحكيو على festival Carthage ..  مازال عليه بكري .. نحكيو على العرس الكروي و التظاهرة الرياضية الأكبر منذ أول دورة ليها عام 1930.

هيا قلنا برا مالا .. Insat Press مراسلكم من قلب الحدث يحضركم لهالتظاهرة الكبيرة .. لذا كل مرة شنحاولو نحكيولكم على الفرق إلي باش تشارك في المونديال و نحدثوكم على تاريخها في كأس العالم و بعض الطرايف إلي وقعت فيه …

هيا مالا خلينا نبداو اليوم بالثمانية فرق متاع المجموعتين A و B ..

المجموعة الأولى تضم على رأسها البلد المنظم روسيا كيما جرات العادة و العوايد، و زوز فرق عربية السعودية و مصر و معاهم الأوروغواي العريقة في ال foot.

روسيا مالا للمرة 11 في تاريخها في المونديال، عام 60 كانت هزت كاس أوروبا و وصلت 4 مرات للنهائي في بطولة أمم أوروبا في عهد الاتحاد السوفياتي .. آخرها طبعا عام 88.

الأوروغواي .. أيقونة في ال football .. استضافت أول نسخة لكاس العالم عام 30 و هزتها و كانت سبب في دمعة البرازيل عام 50 على أرضها وقت فكتلها اللقب.

السعودية .. للمرة الخامسة في تاريخها في المونديال كيفها كيف تونس و المغرب .. مع العلم إنو العدد هذا من المشاركات يعتبر record في تاريخ الكرة العربية، زيد على ذلك إنها كانت أول فريق عربي من آسيا و ثاني فريق عربي بعد المغرب يوصل للدور الثاني في هالعرس الكروي عام 94.

مصر .. أول فريق عربي شارك في المونديال عام 34 في إيطاليا .. و أول هدف عربي في تاريخ المونديال سجلو عبد الرحمان فوزي اللاعب الزملكاوي في مرمى المجر. شاءت الصدف إنها ترجع بعد غياب طويل للمونديال عام 90 في إيطاليا زادة .. والسنة تشارك للمرة الثالثة في تاريخها.

الترشيحات تمشي صراحة في اتجاه تأهل كل من روسيا، إلي يمكن تستفيد من عنصري الأرض و الجمهور، و الأوروغواي العريقة في foot.

تو نتعداو مالا للمجموعة B إلي تجمع كل من إسبانيا و البرتغال و المغرب في دربي ثلاثي شيق و الفريق الايراني.

المنتخب الإسباني يشارك للمرة 15 في تاريخو في المونديال و للمرة 11 على التوالي و في 2010 كانوا أسياد العالم في Cape town جنوب أفريقيا بنتيجة 1 بلاش أمام هولاندا في الدقيقة 116 في ال prolongation على يدين، والا خلينا نقولو رجلين أصح، الرسام Iniesta .. هذا بالإضافة إلى حصدها 3 كؤوس لبطولة الأمم الأوروبية في 64، 2008 و 2012.

المنتخب البرتغالي كان شارك أول مرة في المونديال عام 66 و ضمن المركز الثالث عالميا وقتها بقيادة الجوهرة السوداء الموزمبيقي الأصل Eusébio هداف ال 66 بتسعة أهداف. الرابعة عالميا في 2006 في ألمانيا و بطلة أوروبا حاليا. فريقها الحالي فريق واعد ينتظر منو مردود طيب باعتبار إلي فيه ثلة من اللاعبين المحترفين و على رأسهم رونالدو المحرز ل5 كرات ذهبية.

المغرب هو أول فريق عربي إفريقي يترشح للدور الثاني و يرجعلنا السنة بعد 20 سنة من الغياب.

و إيران السنة لأول مرة في تاريخها الكروي تلعب ضد المنتخبات الثلاثة متاع مجموعتها و خاصة إنها لأول مرة تواجه منتخب عربي.

المجموعة B مفتوحة لكل الاحتمالات، لكن أبرز المؤهلين للترشح للدور الثاني هوما إسبانيا و البرتغال.

من الطرائف إلي يمكن نذكروها على هالمجموعتين إنو إيران و السعودية كل ما يترشحو للمونديال تقريبا بنسبة 90% تونس تضمن بلاصة زادة :

– مع الفريق السعودي في98، 2002، 2006 و 2018.

– مع الفريق الإيراني في 78، 98، 2006 و 2018.

ملتقانا مالا المرة الجاي مع زوز مجموعات نارية، إلي هوما C و D.