العين متعلاش عالحاجب و القلب ميخفي ما يحس …
كلمة تتقال اما فيها برشا معاني …
تخبي الي في القلب اما العين تتكلم و كان هبات العين احساسك مايموتش و يبقا ديما يزيد …
كي تقتلك الكلمة و تغيضك العملة و تقهرك الدمعة لي تحب تهبط اما تحشم تخاف من نظرة الناس ليها من عين كيفها مخبية دمعتها و مظهرا قوة ولا قوه مزيفة و بين دموع مخبية و احاسيس …لكن .. العين كان دمعت مش معناها حزينة … و الاحساس لوكان تخبا مش معناها احساس خايب .. حساس بزايد اي .. متفاؤل بزايد …
مش اول مرة نحكي اما اول مرة نجاهر و مش اخر مرة… يقولو القلب كلامو صادق… معناها قلبي لي بش يحكي … خاطر كلامي صادق 100% ..
خاطرة من خواطري اللي من كثرتهم اما بعمرو لا وحدة تشبه لاخرى…
خاطرة نبداوها بغزرة…
غزرة للماضي
لماضي تجريدي خاطر المقصود بالماضي هو مكان و انسان و اشخاص معينين
الي نعتو بماضي هو مجرد وصف بحكم البعد و الرابط الواحد هو الاحساس لكن اهداف الحياة تخليك تبعد عالماضي و تبني ماضي جديد لي نسميوه حاضر …
خلينا ناقفو على الماضي هذا و ناقفو على حاجة معينة نبداو و نقولو : كي تبعد تتفكر … كي تبعد ممكن على ماضيك و تغزرلو و تقول ياليت عملت اكاكا و معملتش اذيكا … كي تغرز لنوارة مزيانة قاعدة تكبر لكن لازم تسقيها و تحب تسقيها لكن الوردة اذيكا مازلت في مرحلة الماضي … و انت توا في الحاضر…
تحب تبوسها و ترعاها و تعلمها الدنيا كيفاش و تخليها تتعدا من ماضي لحاضر لمستقبل منور كيفها…
مش كلام حزن اما كلام فرحة… فرحة خاطر ترى في الورده قاعدة تنور و تحلى و تتثقف بالرغم من صعوبة الظرف…
نتمنى من ربي العالي و العالم بحالي… يفرح الغالي و يزين سعد اللي في بالي… ربي ينجحك يا وردة في حياتي و لي صغري الكل نعاود نعيشو معاك… دعوة خير لوجه خير… وجودو في حياتي مخليها زاهية حتى في اخيب الاوقات…
ممكن البعض يرا مبالغة في الوصف لكن كي تعرفو الكلام لشكون …غمشو عينيكم وتهيلوه الانسان هذا و كيفاش ينجم يكون و كمية البراءة لي فيه .. كلمة محبة لأختي الصغيرة لي نرى فيها تكبر و تغزرلي قدوة و في الواقع لي هي مصدر القوة متاعي …
Share your thoughts