قداش من واحد تحب؟ قداش من واحد عاش حكاية مزيانة و قداش من واحد تعذب و تكسر و قداش من واحد خاف: حب و خبى و عشق و كتم  و سهر ليالي سارح و يخمم؟.. قداش من واحد خاف يواجه، خاف يخسر و يتجرح و بقى مخبي الي في قلبو و دافنو. خبا دموعو، حبو، لهفتو و سكت.

علاش تسكت؟! علاش تخاف و علاش تخبي؟ فما عباد تعدي حياتها تلوج على الحب. و إنتي وقت لي يجيك الحب تدفنو، تحكم عليه بالموت قبل ميحيى؟!

الحب عمرو ما كان ضعف، الحب عمرو ما كان ذل. الضعف مش إنك تحب، الضعف إنك تخبي، تهرب، تخاف و متواجهش.

العمر يتعاش مرة وحدة، و كل لحظة تفوت معادش ترجع. متضيعش عمرك خايف تحب، خايف تعبر، خايف تصارح، خايف حتى تتحب.

مش غلطة إنك تحب، الغلطة إنك تفرط في الحب.

حب و قول راني نحبك، نعشقك، راني نحب نكون معاك و ليك.

إكتب إنتي حكايتك خاطر إنتي أصل الحكاية و منبعها. رد بالك تخاف، رد بالك تخمم لي إنتي ضعيف، بالعكس، إنك تحب يعني إنتي قوي، يعني تنجم اطيح 100 مرة و تعاود تاقف.

يعني قلبك كبير و روحك حية.

متضيعش حياتك تخمم في الحاجات الخايبة لي ترجعك لتالي، أخرج م الظلمة لي عيشت روحك فيها، اتنفس، عيش الحب، عيش الحكاية..

مش مهم تكون حكاية روميو و جوليات. الكلنا نغلطو، الكلنا نطيحو و نعاودو نقومو، الكلنا تعدينا بتجربة خايبة و اكتشفنا لي أحنا حبينا الإنسان الغالط، أما المهم عاودنا قمنا. هذيكا الدنيا، لازم تجرب و تعيش و تطيح و تتجرح و تعاود تقوم أقوى من قبل. أعطي لروحك و لقلبك فرصة. تنجم بكلمة منك تترسم حكاية مزيانة، بكلمة منك تتبدل حياتك و حياة عبد يستنى فيك. عبر و متخبيش، قول و صيح، فرغ قلبك، متسمعش كلام الي يقولولك عيب أسكت ميجيش. الحب مش عيب، مش حرام، مش المهم تكون طفل، مش المهم تكون مزيان وغني باش تقول نحبك، المهم تكوت إنسان. حب خاطر الحب أحلى حاجة في الدنيا.

بقلم منال عيساوي