عمركشي نهار بكيت حتى تقطع عليك النفس؟.. ولا بكيت حتى دخت؟… راسك رزن مالبكاء؟…
عمركشي نهار بكيت بالشهقة على حاجة متاعك و شويا و تضيع من بين يديك؟… عمركشي نهار قلبك وجعك من كثر التخمام و وليت تشرب في الدواء باش تبقى مصحصح و تنسى وجيعة راسك من كثر ما مخك يخدم؟…
عمركشي نهار حبيت إنسان و كنت مستعد تفديه بروحك و شويا فيه؟… عمركشي نهار حاولت تبعد علي تحبو و كيف حاول يسلم فيك قيمت الدنيا و قعدتها؟
عمركشي نهار بكيت مالحب؟… مالوحش لي يقتل فيك كل ليلة عرق بعرق؟… ولا حاولت تبعد ماشي في بالك البعد ينسي و ينقص مالوجيعة…. لااااا هنا تغلط… البعد يزيد يقتلك في اللحظة ألف مرة. البعد يحيي فيك كل إحساس مزيان… وجيعة كرشك المزيانة من تأثير اكا الكلمة الحلوة لي تسافر بيك لعالم مايعرفو حد غيركم… « نحبك »… اي نعم نحبك… نحب النهار لي نفيق فيه على صوتك… نحب الصدفة لي جمعتنا و خلاتنا نوليو هكا… نحب البلاد لي بعدتنا على بعضنا و خلات حبنا يزيد نهار بعد نهار…
نحب الكتيبة لي خلاتني نموت و نحيا بيك… نحب حياتي معاك… نحب الحب لي مقوينا رغم البعد و التعب و الشقاء لي مزال يستنى فينا… نحب الدعوة لي تدعيها مما كل مرة « ربي يجمعكم بما خير منكم »… اييييه… ماتعرش لي نا تو عايشة أحسن قصة حب تنجم تعيشها اي بنية في عمري…
نحبك
نحب اسمك… كلامك.. ضحكتك.. حبك.. صدقك… وضوحك و صراحتك. نحب غيرتك و نحب….
نحب كل شي يفكرني فيك… تي ديما نفكر فيك. نحب كل لحظة ملي عرفتك
نحب كل بلاصة مشيتلها و نا نخمم فيك « كان جا هو معايا »…
كان و كان و كان…
تي كهو يزينا مالكلام…
هيا نتقابلو… حط يدك في يدي… قلي نحبك… و خلينا نسافرو بعيييييد
تعرف وين؟؟ حتى نا مانعرفش ههههه… أما هيا هزني و خبيني عندك كيف أي حاجة من الحاجات لي تعز عليك
نحبك.
A.I.G.G
Share your thoughts