قداش نحبك، قداش نعشقك، نتوحشك، نتوحش حضنك كي نفرح، نتوحش حضنك وقتلي نبكي، نتوحش حضنك في الغربة، نتوحش حضنك كي نضعف. انت الوحيدة الي ما تستاناش مني مقابل، تعطي و تعطي و ما تستاناش نرجعلك مهما نمشي و مهما نبعد. انا بحبك طاير و بعينيك هايم و بحضنك هادئ، حتى كي نغلط في حقك انتي الي تجي تحكي معايا تدعيلي، و مهما غلط قلبي يدق ليك انا اساسا ما وصلت عشت كان بتضحياتاك. انا ماشي و نكبر و انت تعطيني من لحمك. نعرف حرمت روحك من برشا حاجات شتهيتها على خاطري، تشوفها بعينيك و تتماناها اما تبجلني عليها. انت نور عينايا و كي تمسك حاجة الدنيا تظلام في عينايا.  انتي الي جعلت مني رجل و بفضلك وصلت للي وصلتلو، انا كيف مرضت، كي وصلت للموت، ريت عينيك مدمومة، ريت العذاب في عينيك، ريت الحب، ريت الحنان، ريت الدمعة. انا اللي كل يوم نروح نشم ريحتك نعنقك نبوسك من جبينك و ننسى همومي كي نشوفك، نشوف صحتك الي نهشت منها من نهارت الي وعيت على الدنيا، انا ماشي في ثنيتي و مطمن الي ظهري محمي بيك، دعاك وكلامك ماشين معايا في كل ثنية.

نتفكر ايامات شفتك فيها تاعبة مت فيهم و عمري ما ننسى كل لحظة ضحكتها معاك، بستك و عنقتك و هزيتك. عمري ما ستنيت منك كلمة نحبك، افعالك تحكي و دعاك متبع قلبك منبع عينيك تنفع و نورك يلمع حبك درباني و دعاك حاميني و حضنك يدفيني و كلامك يواسيني. نرفع راسي قدام خلق ربي، نطبع على جبينك قبلة و نقول و نعتز: انت أمي، انت حبيبتي، و كل ما يمسك يمسني، و الي يقربك ينسى حياتو. انا العاقل، انا الهادئ اما قدام دمعتك يتفجر انسان اخر، انسان مجنون.

هذا انا ولد امه قدام الناس، انا نكتب، و نغزرلك، و طاير في هواك، نعنق و ننسا الي فات. انت امي قدام الله و العباد الحمد لله نفسك مالي القلب، احلى احساس تدخل للدار، تتبسملك، تعنقها و تنسا ما قاسيت، و تقول امي عانات اكثر ملي عانيت. و انا نتامل عينيك نفيق و نضحك و خلي الي باش يصير يصير.

الله يرحم كل ام في قبرها، و لكل صديق او زميل او حتى عابر سبيل فاقد الحبيبة، ما تبكيش راك اكيد محمي بدعاها، هي اكيد تعشقك و متمنيتلك كل خير، كل نهار جمعة زوروها اكيد نستانا فيكم تخبروها و تحكيولها حياتكم، و اكيد هي حية داخلكم، ادعولها بالرحمة و اخرتنا للتراب و باللي تقدروا كل حد يعطي حق والديه خاصة، و حق الناس الكل عامة، و طول عمري نحبك يا »حبيبة ».