إنصاطير | كهف السرايا المسكون

يا سادة و يا مادة يدلنا و يدلكم على طريق الخير و الشهادة…

حكايتنا اليوم على جزء كبير في القصر، لا فهمو جن و لا بشر، بلاصة غامضة و ظلام، تهامست الناس و علاها حكاو برشا كلام. حكايتنا اليوم علي يقولو عليه توّا « الأوديتو » و حدّ فيكم ما يعرف حكايتو…

البلاصة الكبيرة هذي بانت في السرايا و تنصبت فيها الشموع و المرايا و تلونت باللون الأحمر و تغطات بش ما يضربش فيها القمر و قامت فيها الغنايات الحزينة و البشر تحبسوا فيها في تركينة… البلاصة هذي هي مذبح الجنون و كيما تعرفوا مادام كثرو الضحايا كان لازم يخصّصولهم بلاصة في السرايا… أذاكا علاه حطّو فيها مسرح كبير فيه يقتلو الغني و الفقير، و حطّو قدّام المسرح برشا كراسي، يتفرّجو علاهم الجنون مادام حياة البشر عندهم ما تسواشي و مدخل من تالي مِنّو يدخّلوا الضحية لي ماعندو إمّالي.

البلاصة هذي لتوا تخوّف العباد و حتى نبّاش القبور ‘القطوس’، خاطر الجنون لتوا يقيموا فيها في الطقوس… يتفاهموا مع كبار البشر الّي متحكّمين في الإنسات المذبح ما يتحلّ للناس العاديين كان وقت التظاهرات و باقي الوقت الجنون فيه تبات و تتنصب غناياتهم و الميت قبل ما يتذبح يقول كلمات. و حتّى وقت « الأوديتو » يبدا محلول للعباد تسري في البلاصة تعييطة ترد النار رماد، تعييطة الجنون ملهوفين على ضحية؛ غني كان ولا حتّى فقير و الحكاية لليوم قاعدة تصير…

تصويرة الكوفارتور: aeroday 2017