مزال الخير في الدنيا | تونسي يكتشف الماء على القمرة

في قلب الفوضى والهمجية الي نعيشوا فيها اليوم، في بلاد الي الخبر الحلو ولينا معادش نحكيوا عليه وما نعطيوهش قدر وقيمة كيفما الخبر الخايب .. أي نعم، أكا الخبر الي ما يعديوه كان هو في التلفزة والراديو.

في وسط هذا الكل، نلقاو شبابنا التونسي مشرفنا البرة وهازز أكا العلم اﻷحمر الي برشا توانسة ولاو يراوه مجرد قماش.

الجمعة الي فاتت مهدي البنة تونسي في الناسا أصيل مدينة نابل مختص في علم الفلك .. شاب كيفو كيفنا آمن بحلمتو و نحى كلمة مستحيل من قاموسو. وهو صغير يهز راسو للقمرة ويقول في يوم من الأيام شنعرف انتي شنوة مخبية وشنوة سرك …

بعد ما قرا في الENIT وتحصل على الدكتوراة في علم الفضاء من جامعة تولوز بفرنسا جاء أكا نهار الي اكتشف فيه مع فريق بكلو كفاءات بالتعاون مع عباد من جامعة MARYLAND-BALTIMORE و JOHN HOPKINS الي القمر فيه ماء، وماهوش مجرد جرم سماوي يطل علينا من الليل لليل ونعرفو بيها التقويم الهجري ولا نسهرو تحتها في الصيف ويبدا ياكل فينا الناموس …

اليوم ولينا نعرفوا الي موش كان المريخ فيه الماء، وتحلت بيبان جديدة وأمل جديد للبشرية باش تحل مشاكل الماء الي عندها باعتبارو أساس عيشتنا.

كيفما مهدي اليوم لمع نجمو وحكاو عليه البرة وداخل تونس وهز راية تونس الفوق وكسر الstéréotype متاع التونسي الداعشي اﻹرهابي، فما برشا شباب كيفو يخدمو صباح وليل بش يحققو حملتهم وينجحوا.

نختم المقال هذا بإنو أي عبد ينجم ينجح ويخلط كان يخدم ويكبش ويتعب حتى شيء ما يجي بالساهل.