زعمة علاش؟

هي حكاية كيما كل حكاية

ليها بداية كيما ليها نهاية

لحكاية لا بدات لا بتبسيمة ولا بغزرة

ولا هي حكاية عشق من أول نظرة

هي حكاية تبنات على العشرة

هي عشق زوز على الحلوة و المرة

و كيما تعرف الحب يصنعلك جوانح

و يخليك باللي تحبو فارح

يعليك و يهزك الفوق في السماء

و يخليك تحلق كالطير في الهواء

حتى لين يخونك جناحك و تطيح ..

و بعد الطيحة تجي برشا حاجات

تجي الغصة والحسرة والآهات

يجي بعدها الملام ويتقال برشا كلام

لاهو باش يرجع الفرحة و لا باش يقدم القدام

تحس بالضعف و القهرة و انتي تتفرج

تسلم أمرك و تستنى ربي يفرج

و في الآخر تاقف قدام المرايا و تسأل : أنا شكون؟ شنوا اللي صار؟ و علاش أنا؟

علاش كيف حبيت نفرح تكويت؟

و ياما حطيت راسي على المخدة و بكيت؟

علاش توجعت و تقهرت و تشويت؟

و غير الحزن و الغمة ما ريت؟

أما فما سؤال حد ما يسألو لروحو :

علاش صار اللي صار؟

كل حد فيهم غاطس في جروحو

و لا نجم يستوعب هالخنار

زعمة يجي نهار و كل حد يراجع روحو

و يعرف علاش تكوا بالنار؟

زعمة مش على خاطر ما عرفتش تحبّ؟

خمم و زيد خمم، لعل هذاكا هو السبب …

بقلم زهرة الياسمين