خايفة

..خايفة و انا الي عمري ما خفت قبل
..وانا لي طول عمري كنت واقفة لروحي و قوية
..خايفة من حاجة ربي عطاهالنا بش نفرحو بيها

..من حاجة تخرجك مالفدة لي عايشين فيها واحنا وحدنا

..من حاجة تبدلك من نظرتك للدنيا

..من حاجة تخليك تزيد تتعلق بيها تخليك تلقا علاش بش تقوم صباح و تشجعك عالخدمة

..حاجة تميزنا على كل ماهو حي في الدنيا

..حاجة جمعت آدم و حواء..الي كلنا متساوين فيها

..و الي خلاتنا مايهمناش لا في لعمر..لا الزين..لا الجنسية و لا حتى الدين

..خايفة مالحب

اي انا خايفة نحبك ..
خايفة ..
خايفة لا نموت بغزرة عينيك.. عينيك الي يشعلولي نار في قلبي كل ما يضحكو لعينيا ..
خايفة..
خايفة نضيع و انا بين يديك .. وانا نشبع بريحتك الي مش مفارقتني..
خايفة وانا نحكي معاك يوصلك صوت قلبي يقلك متسلمش فيا.. يقلك قداه محتاجك .. يقلك قداه متوحشك ..
متوحشك حتى و انت بين عينيه الي حافظين كل شيء فيك.. من تعويجة فمك و تقويسة حواجبك.. للمشيتك و وقفتك الي بسحروه ويشدوه ليك ..
خايفة خاطر ما نجمتش نتحكم فيه.. ما نجمتش نقلو ما تتعلقش بيه..ما تتوحشوش..ما تحبوش.. راك تتعذب كيف يمشي عليك و ما تلقى حد يداويك ..
خايفة لتكون انت كهو لي ينجم يداويه ..
خايفة مالنهار لي تكون فيه مع وحدة اخرى غيري أنا ..
خايفة تعيش الي حلمت نعيشو معاك معاها ..

خايفة من إحساس التملك و الانانية للي تعلمتهم بعد ما حبيتك
الإحساس هذا معذبني..
و رغم هذا ما نجمش ما نفرحش كي نشوفك فرحان و مرتاح.. حتى وكان معاها..

..ما نجمش 

… انا الي قلت عمري ما نخاف