… قصة حياة

عمرك جربت الاحساس اللي توجعك حاجة تطفيها مرة و اثنين و اكثر ..

مرة خاطر تكره جو السبيطار و مرة خاطر حكاية فارغة تو تتنحى بكعبة بانادول ..

و مرة خاطر ماتحبش تفلت خرجة و مرة خاطر ماعندكش وقت ..

و الوجيعة ماشية و تزيد و الخوف ماشي و يكبر و انت تتهرب و تخبي على اللي دايرين بيك اللي فما حاجة توجع فيك ؟؟؟

عمرك جربت اللي تمشي تعدي على حاجة تطلع عندك حاجة اخرى انت خايف منها و تهربت منها برشا؟؟

عمرك جربت انك تخبي الوجيعة بش العباد اللي تحبهم ما يتوجعوش..

زعما كي يعرفوا اللي ايامك في الدنيا يتحسبو على صوابع اليدين شنيا بش يصير فيهم و كيفاش بش يخليو حياتهم و يقعدوا واقفين في ظهرك بش ما تطيحش؟؟

امك و بوك كيفاش بش يتقبلوا اللي انت مريض و اللي الحاجات اللي حبيت تعملهم في 60 سنة يلزمك تعملهم في 6 شهور..

قرايتك اللي مازالت و الفواياجات و الكادوات اللي حبيت تجيبهم و الهبلة اللي مازلت ما سيبتهاش و دار اللوح اللي مازالت ما سكنتهاش و الطيارة اللي ما سقتهاش و الشركة اللي ماحليتهاش و الاولاد اللي حبيت تربيهم و الحيوانات اللي حبيت تعنقهم و البحورات اللي مازلت ما عمتش فيهم و الماكلة اللي شاهي تذوقها  ووو…

عمرك جربت تقول لا للدواء.. خاطر تعرف اللي هو بش يقتلك مش المرض..
خاطر تحب تعدي اللي بقى من عمرك فرحان و مرتاح..

عمرك ما لحظة ضعف بدلتها بقوة؟؟

على الاقل انت تعرف نهايتك كيفاش.. ماكش بش تتخطف في حادث و الا تموت كبير وحدك..

بش تعرف كيفاش تقسم وقتك و تعمل record و تبدل نهار بسنين..

العباد اللي تحبها صارحها قبل لا يفوت الفوت و اللي مغششها راضيها و حب اللي دايرين بيك الكل على خاطر الدنيا فانية …

وديان السويد