محب كئيبٌ

– نقلك حاجة!

– ام

– نقلك وماتخافش؟ أنا ديما معاك .. مستحيل نقلق منك، مستحيل نخليك. تغمض عينيك، تلقاني قدامك كالنجمة، كالنسمة، كالزهرة إلي ريحتها بنينة ..

نسمع في الصوت و موش مصدقة، أكيد أنا متخيلة، هذا إنس ولا جان؟ روح .. ولا شبح؟ حقيقة ولا خيال؟

هاذي أكيد حلمة، حلمة باهية غدوة باش نفيق منها وما نلقى منها شي .. تكون سراب عشته، زعما حقيقي؟ أنا موش وحدي .. ودمعي ماعادش نبكيه وحدي؟

قداش من مرة نسمع كلام حلو .. غزل مراهقين، وأنا نكذب ونسكر البيبان، إلي يملى عيني لازمو يرى عيني ولمعتها، ووقت تطفا بهجتها يسأل ويستفسر.

كي الفراشة إلي تطير وترفرف،

كي النّسمة إلي ما تبقى في مكان، نسمع ونطير ويا ناس ما كان باس.

لين جات ليله طويلة، خوف، ظلمة، بلاصة موحشة، قلبي موش عارف يعبر، والستيلو في يدي موش عارفة كيفاش نكتب.

شنوة نكتب ولشكون؟

تخنقت .. مرة أخرى وحدي في بير تخوف، ياسر بلاصة موحشة، دنيا ظلام، ويني النجمة إلي قالت أنا ديما معاك؟

ويني الزهرة؟

من أول ريح طاحت .. أوراقها هشة، فيساع مالت ..

نقلك حاجة وتفكر؟

دواء الإكتئاب الحب ّ .. و ما الحب إلا للشجعان

===

آية الكحلاوي