المواطن مسروق

في بلاد المواطن فيها متعذب؛ مصروف الدار، كراء، ضوء، ماء، دوايات..
نلقاو المواطن عايش حمدلله مستور و يستخايل روحو مش مخدوع و مش مسروق.

بعد تعب نهار كامل يجري ويجري بش يخلط على خبزة للصغيراتو.. هاو ميترو هاو تران هاو نقل جماعي..

يجي يحسب يقول أنا رابح بلي بش يكون، أنا ستعمل في النقل العمومي الي الدولة مسهلتلو التنقل بأسوام مرفقة.
الا أنو أعوان « الحاكم » و الي بدورهم عايشين نفس النمط في حياتهم، يستغلو في المواطن الزوالي.

كيفاش؟

قالك يا سيدي مواطن تونسي يركب كل يوم الميترو 2 و الميترو 6 مرتين في النهار ب 320 من المليمات الميترو.
هيا نحسبو عملية بسيطة ما أسهلش منها:
*في اليوم(320×2)×2مليم=1280مليم
*في الجمعة (مغير ما نحسبو نهار الأحد)=7680مليم
*في الشهر الواحد= 30720مليم
ما نطولش عليكم..
أكيد المواطن معندوش كليوم 80مليم مصرفين.

المواطن هذا يمشي للقيشي و يعطي 350مليم و ياخو تسكرتو ويستنى الباقي.
-الي في القيشي : « أقعد استنى للغدوة »
-المواطن: « نستنى الباقي بش ناخو بيه الميترو الجاي، هاو عندي 10مليم نعطيهالك تعطيني ال 50؟ »
-« لا ! الحاكم ما ياخوش بالناقص »
-« مالا أنا نتسرق مالحاكم معناها؟! »
-« الحاكم فوق الكل! »

منستغربوش، هذي حقيقة و تصير كل يوم في أي وسيلة نقل عمومي منحكيوش على الشتم الي يتلقاه المواطن كل يوم من أعوان وسائل النقل العمومي.

السؤال المطروح : شكون السارق؟ الحاكم ولا الأعوان؟

بش يقولو أكيد الأعوان.. اي باهي اما ايجا نشوفو علاه!

العون هو بيدو يعيش في نفس وضعيات المواطن أي غلاء المعيشة، الضوء، الماء الخ الخ.. و هو بيدو ما يتلقلش رقابة صحيحة مالدولة الي تعاونو بش يكمل في « السرقة » و ياخو معاه نسبة مالفلوس.
بش تقولو ماهي الا 30مليم!

ايا نعودو نحسبو:
*40 مواطن في النهار مايخذوش 30مليم أو أكثر الباقي متاعهم في اليوم = 1200مليم
*في الجمعة = 8400مليم
*في الشهر = 33600مليم
هذا يصير كيما قلتلكم في جميع وسائل النقل العمومي!

نفهمو هنا الي المواطن مسروق و الدولة مسروقة زادة!
و من شكون؟
من المواطن بيدو!

هاذي ماهي الا لمحة صغيرة على السرقة في تونس.

ومش لازم كان الدولة تدخل! لازم المواطن يفيق على روحو و يفهم الي هو بيدو يسرق في روحو!

و السلام.