مسلسلات رمضان : تونس 2050

بعد ما تشطر سيدي رمضان ظهرلي وقيت باش نحكيو شوي على حاجة من أساسيات الشهر اللي هيا المسلسلات.
يا سيدي صحة شريبتكم و مرحبا بيكم في أول تجربة في الrubrique الجديدة متاعنا #مسلسلات_رمضان بعد ماوفات برشا مسلسلات و برشا مازالو مطولين منجمو نقولو اللي رمضان 2020 كان متنوع و زاخر بالأعمال التونسية فيها اللي نجح و عمل ضجة و بقات الناس تحكي عليه و فيها اللي كانت عندو هفوات ونفس الشي تحكا عليه ماهو المتفرج التونسي ناقد محترف بالطبيعة.

في أول تجربة نحب نحكي على حاجة خفيفة و نظيفة و يمكن أكثر حاجة ضحكتني في رمضان السنة اللي هي تونس 2050.
تعتبر série هاذي الأولى من نوعها بحكم كونها أول dessin animé 3D تتعمل في تونس و للي ميعرفش السنة هو الجزء الخامس من الsérie رجع بعد انقطاع دام اكثر من 5 سنين.
الحكاية و ما فيها، السيناريست عاملين تخيل لشكل الحياة في تونس عام 2050 و التطور الحاصل في عيشة التونسي بعد القفزة التكنولوجية. الحكاية مقبولة والشخصيات خفاف على القلب و يضحكو déjà اكتشفنا القدرة متاع برشا ممثلين انهم يلعبو باصواتهم و يتقمسوا أكثر من شخصية في فرد scène كيما جعفر القاسمي، وسيم الحريصي، و اللي ابهرنا عزيز الجبالي في تجربة جديدة و غيرهم من الممثليين.

نحب نحكي زادا على الqualité متاع الخدمة و اللي تفرج قبل يشوف الفرق في التصويرة و les détails متاع الشخصيات تي حتى من les rides في شخصية الحماة موجوديين. و زادا Les scènes قصار و ضامريين موش طوال و يفددوا.
يمكن الحاجة الوحيدة اللي فسدت الخدمة الكل انك تحس مافماش ترابط بين الأحداث كل حلقة و قسمها و كل حلقة وعلاش تحكي و باش منكذبوش فما حلقات شخت فيهم و عاودتهم أكثر من مرة و فما واحدين لين وفوا و انا نستنا في الفازة وينها.
عمل يستحق التقدير جدا و أكثر حاجة تضحك في التلفزة نتصور في النص الأول من الشهر الفضيل. اللي يحب يتفرج فيه توا يتعاود على الحوار التونسي بعد شقان الفطر و ننصحكم اعملوا طلّة باش تكتشفوا الشخصية العظيمة « كبّار » مولى kabarTV و صاحب الجملة الشهيرة « ذكي نا ».

استنونا في الحلقات الجاية و خليولنا رايكم في les commentaires.