اسأل طبيب : مهم نشرب برشا ماء؟ وكيفاه نجم نشرب أكثر ماء خاطر ما نعطشش بلكل؟

.رمضانكم مبروك ناس الكل
أنا أشرف الإيرماني طالب سنة ثالثة طب بكلية الطب بتونس وهذا أول سؤال نجاوب عليه في الربريك جديدة #إسأل طبيب إينسات براس إلي بش ترافقكم كامل شهر رمضان
فرحت ياسر بأول سؤال على خاطر يحكي على حاجة مهمة برشا

مهم نشرب برشا ماء؟وكيفاه نجم نشرب أكثر ماء خاطر ما نعطشش بلكل؟

.نبدو ب كليمتين صغار على الماء والأهمية متاعو (حاجات قريناهم سنة ثالثة ورابعة في الإيقاظ العلمي)
.الماء هو أهم عنصر يحتاجو جسم الإنسان (و أي حاجة حية) بش يقوم بالوضائف متاعو و بش الأجهزة متاعو تخدم
الماء يدخل تقريبا في كل شي في بدنك تركيبة الدم الأنسجة الخلايا بين الخلايا الإفرازات متاعنا عضلاتنا كل شي أذاكا علاش نلقوه بنسبة 50 حتى 70 % في بدنا 45 لتر بنسبة لراجل بالغ يوزن 70 كغ
.وبش نحافظو على نسبة هذي لازم نضمنو لجسمنا كمية ماء يومية متقلش على 2لتر وعلاش لا نوصلوها ل 3 لتر

علاش؟

(خاطر بدنك يخسر كل يوم الماء متاعو من خلال التعرق البول و حتى التنفس(إيه فما كمية مل ماء تخرج وقت الزفير في شكل بخار
ونقص الماء في بدنا ينجم يتسببلنا في أعراض كيما وجيعة الراس والدوخة و غيرو وكان النقص هذا يتواصل على مدة طويلة نجمو نوصلو للجفاف (deshydratation ) حاجة خطيرة برشا لازم ما نستهانوش بها

باهي كي شوفنا تو قداش الماء هذا مهم بنسبة لينا و لصحتنا و انو نقصو في الجسم يتسببلنا في برشا مشاكل ايجا نشوفو تو كيفاش نجمو نوفقوا بين الصوم  و بين توفير كمية الماء الي يحتاجها جسمنا بطريقة ساهلة برشا …نطبقو 8 نصايح هاذم: 

1) نحاول نشرب من 2 ل 3 لتر ماء من شقان الفطر حتى السحور(الإمساك)

2) مانشربش كميات ماء كبيرة في أوقات صغيرة غالط! لازم نقسم كمية الماء هذي ( 2 /3 لتر) على كيسان (كاس كل ساعتين)

3)أول ما نشق فطري ناخو تمر و بعد كاس ماء باهي ما يكونش بارد برشا خاطر معدة بش تكون حساسة بعد مدة طويلة من قلة الخدمة

4)في وسط الماكلة ما نشربش بالكل و حتى لبعد الماكلة بساعة ساعة ونص …علاش؟خاطر وقت الماكلة يصير إفراز أنزيمات هاضمة (إلي بش تعاون عل الهضم) في الجهاز الهضمي متاعك و الأنزيمتت هاذم يخدمو في تركيز(concentration )معينة كي تشرب ماء التركيزات هاذم يضعفو (dilution ) و نطيحو في سوء الهضم

5)الماء مش بضرورة يكون الماء العادي اذاكا نشربو منو حتى 2 لتر 2 لتر و نص و باقي ناخذوه في أشكال أخرى كيما خضرا و الغلة(تفاح فقوس خس) الغنية بالماء اما زادا غنية بالألياف الي تحمينا مسمنة و تعدللنا نسبة السكر في الدم

6)نجمو نزيدو مطعم بنين للماء متاعنا كيما شوي قارص والا نعناع للناس لي متحبش ماء وحدو افكار كيما هكا تعونا نوصلو لل هدف متاعنا حاجة أخرى لازم ما نربطوش شربنا للماء بإحساسنا بالعطش نشربو ماء كل ساعتين حتى و أحنا مش عطشانين.

7)نحاولو قد ما نجمو نقصو مل ملح و التوابل في الماكلة متاعنا خاطر الحاجات هاذم يسببولنا إحتباس ماء في الجسم و الإنتفاخ و القلق بصفة عامة

8)بالنسبة للعباد لي تترنا (تمارس الرياضة ) في رمضان ما نسيتكمش إنتوما بذات تستحقو كميات ماء إضافية خاطركم تخسروا وقت التمرين برشا ماء أحرصو أنكم تعوضوه
كي نتبعو ال8 قواعد هاذم نجمو نستفادو من صيام سيدي رمضان و نوفرو للبدن متاعنا كمية الماء لي يحتاجها و نقصو لmax من إحساسنا بل عطش

انشالله نكون جوبت كيما يلزم على السؤال نستنا أسئلتكم الجاية الي عندو أي أفكار والا ملاحظات ولا عندو ما يقول فل موضوع يخلي commentaire
et à la prochaine .

بقلم أشرف الإيرماني.