Review | بيك نعيش

باش نحكيلكم على آخر فيلم تونسي تفرجت فيه اللي هو « بيك نعيش ». فيلم مزيان و القصة متاعو أزين و تلم برشا حكايات: الحب، العائلة، الأوضاع السياسية بعد الثورة، حالات التمرد في ليبيا، تجارة الأعضاء و برشا حاجات آخرين …

باش منحرقش الفيلم للعباد إلي تحب تتفرج فيه، الحكاية و ما فيها عايلة متكونة من أم و أب و صغير اسمو عزيز. بعد بالضبط 6 شهور بعد الثورة (التاريخ المذكور اول الفيلم 26 سبتمبر 2011)، يقرر الاب يوسف اللي هو PDG متاع شركة، إنو يمشي يشوف حالة الفوضى اللي صارت في واحد من المصانع التابعين للشركة في تطاوين، و يهز عايلتو معاه باش يتفرهدو.

في نهار، متعديين بالكرهبة من بلاصة، هجموا عليهم مجموعة من الثوار و ضربوهم بالسلاح. الأم و الأب خرجو لاباس و الضرر الكل جا في الصغير: ضرر بنسبة 80% على مستوى الكبد.

منطولش عليكم، ندخلوا في الخوضة متاع كيفاه ننقذو الصغير و يبقى حي. برشا أحداث مهمة في تاريخ العايلة باش تصير، باش تعيش معاهم و تحس معاهم بمجموعة من المشاعر ياسر محلاها. فما des scènes ياسر يخلو أثر فيك بعد الفيلم.

الصورة ممتازة و التصوير كان ياسر محلاه، و التصاور اللي في تطاوين كانو في غاية الروعة و يورولك روعة بلادك. أداء الفنانين ممتاز نجلاء بن عبد الله و سامي بوعجيلة و بالأخص صلاح مصدق، مبدع كيما العادة بالرغم اللي مشاهدو موش برشا.

الفيلم، كيما اي فيلم تونسي، النهاية متاعو مفتوحة و تعطيك المجال انو تخمم و تحكم كيما تحب. اما متنجم تقول كان كهو متنجمش تكون كان هكا الخاتمة.

في الآخر نقول الفيلم موش masterpiece و فريد من نوعه، أما فيلم تونسي مزيان يستاهل انك تمشيلو و يستحق المشاهدة عالاخر زادا، و تنجم تقول انك فخور انو العمل هذا تونسي.
À recommander!!