Connect with us

À vos plumes

Zodiac Signs | الميزان المزيان

Avatar

Published

on

[simplicity-save-for-later]

انت ياللي تقرا في خرافات أبراجي و قاعد تستنى و تلاجي
هدرة اليوم راهي بدعة
لا وردت في كتب عجم و لا طليان
لا سمعو بيها صغار
و لا حكاوها عزايز ولا شيبان
ايجا نحكيلك عالميزان
مد وذنك و اسمعني خنقلك قداهش خرنان و شخنان
خلي كيف يسيب الدلول و يولي رهدان
هو راهو عز الناس
صاحب ذوق و فنان
عاطي للوهرة كار و نصيب
و يعشق زينة و ألوان
فمو بالضحكة متبسم مايقول اللي عليه يندم
والا يا ليت الي جرا ما كان
كان تحتاجو في حاجة
على ربي عمل و اطمان
اسمو على جسمو كفة بكفة
مرة فارغ مرة مليان
لا يهمو فاش قال فلان و لا شغنى علان
تركيزو كان في اللي يهمو
هو مركز الكون و لحياتو هو السلطان
ما يخممشي في الماضي ولا في أيام زمان
قالك أحنا أولاد اليوم
ما نهتموش باللي جرا و كان
لمعة عينو كي يضحك تحكي عليه حكايات
رغماللي يهدر برشا
سرو في قلبو مات
كاني أنثى راهي أميرة بنت السلطان
في مشيتها في رتبتها حتى في صوت ضحكتها
زيتها و بنتها وقت تركز خطوتها
سرها في ذخامتها و أنوثتها
بغمزة تطيح خيار الفرسان
و كانو ذكر راو قلوب العذارى ذوب و قهر
كان مش ربي ستر
يا سيدي على ولد الريح
كي يبدى طاير ما يطيح
ما يتفاهمش مع أبراج الماء
لكنو يحب الجوزاء
راسين فرد شاشية
خاطرهم أولاد الهوا
كان واجهتو بالعقرب تخلا ويحل القضا
و عقاب السيرة
أسمعو هالعبرة الكبيرة
حبو لبعضكم الخير هالحياة مهما طالت تقعد قصيرة

Share your thoughts

Hola ... My name is Rim you can Call me Rima ...An English Major ...An art addict ...A reader ...A writer ...I was born to remind people to laugh ,enjoy life,and love each other <3

Series of stories

قصر الحكومة بالإنسات | المعارضة

Avatar

Published

on

[simplicity-save-for-later]

By

يا سادة و يا مادة يدلنا و يدلكم على طريق الخير و الشهادة.
كيما نقولوا قبل كل حكاية، كي تقرا نحبك حالل مخك مش حاير و تخطف المعنى وهو طاير.
يا حسرة كي كانت أكا الأرض مسكونة و يا حسرة كي كانت حيوطها سخونة… توا في 2080 أرض الجنون المشومة ولات أرض العلم و القراية الدمدومة و ملي ولاو كبارات البلاد الكل يخرجوا من غادي صبحت قصر السلطة و الحكومة، وقرارات البلاد ولات تتاخذ من غادي و الوزرة داخلين خارجين شي عادي و اسمع يلي ماتسمعش : مقر الحكومة صبح في الإنسات و وزرة البلاد غادي قرات.

عاد فتكم بالحديث، عام 2079 تشكلت أول حكومة إنساتية و تم الموافقة عليها من طرف السلطة التشريعية.
و كيما أي حكومة ناجحة و فيها كفاءات لازم تلقا ناس فساد تحب تطيحهم و تحب تبقا من البلاد تقتات.
لوبيات البلاد المرة هاذي تلموا و عملوا في الإنسات عمارة و سماو رواحهم اسم جديد : سماو رواحهم الإدارة.
يحكيو أنو المعارضة الجديدة حبت تعمل للحكومة مكيدة وتخلي البلاد على الازدهار بعيدة أذاكا علاه سكّروا برشا مؤسسات عمومية و ولّاو يكريو فيها للحكومة بالمناسبات تقول وطيّة و طلبوا مقابل بقية المؤسسات زيادة في الشهرية.
و يقولوا زادا أنهم حاولوا يعطّلوا الوزرة في خدمتهم : ماخلاوش وزارة الطيران تصنع طيارات و تجيب طيارين باهين و ماخلاوش وزارة الروبوتات تجيب مستشهرين من الصين و حتى أكثر وزارة تشغّل في الناس قطعوا عليها الماتريال و ماخلاوهاش تكوّن المنخرطين و كل وزارة عندها حكاية و رزمة مشاكل مع هالمعارضين.

يقولوا أنو وقتها الوزرة تفاهموا برشا مرات مع المعارضة الي شعّلت في البلاد حريقة و صحّحوا معاهم عشرين وثيقة و كل مرة كانوا يخونوا الشعب إلي عطاهم الثيقة لكن العدل عمرو ما يبطى دقيقة، و يا نهار إلي يجي و يرتّح الوزرة و البلاد من هالشقيقة.

Share your thoughts

Continue Reading

Reading List


[simplicity-saved-for-later]

Made with ❤ at INSAT - Copyrights © 2019, Insat Press