Zodiac Signs | الجوزاء : ملك الكواكب

خرافتنا اليوم عاللي برجو بالزوز

يصبح زاهي و يعشي منبوز

نهار يرضي و يبشبش و عشرة خشمو عليك مهزوز

أما كانك شاري العشرة معرفتك في ملك الكواكب كنوز

عويناتو تلمع بالزور

ما يبيعش عشيرو مهما الزمان يدور

نرفوزي و فيسع ما دمو يفور

لكن قلبو أبيض و ووجهو يضوي بالنور

 ذاكرتو قوية كل شي في مخو محفور

ضامر و حداث كي يدخل في لمة عمرو ما يكون محقور

في كل بلاد يدور و على أخلاقو ديما مشكور

 يا جوزاء يعجلك سور و عدوك مكسور

يقولو عليه بزوز وجوه

قالو عليه كذاب هاذوكم اللي كرهوه

وعلى كلامو المعسول نبزوه و ظلموه

أنا نقلكم أحكمو على طبعو كان كي تعاشروه

حنانة الدنيا في قلبو

و النفحة ماهيش ذنبو

هكاكة خلقو ربو

داخل بعضو و مش فاهم روحو

و عينيه بأسرارو يبوحو

من طول لسانو مفضوح و هداريه فيسع ما يفوحو

مرة تحسو حنين و مرة تحسو قاسي

لكن مايشدش البغض ديما مشاكلو ناسي

بالضحك و التفدليك يتلف في المآسي

يقولو عليه منافق لكنو ديبلوماسي

ملك الكواكب

سفينة في وسط المراكب

لكن في عوض الربان عندو ثنين

واحد فرحان و لاخر حزين

و هاك الجوزاء مابين نارين

عمرو ما ينجم يرضي هالزوز سلاطين

يا ويل اللي قلبو للجوزاء مال

تلقاه وراه من حال لحال

عايم في جرتو من موجة لموجة

في كل تشقليبة كبدتو ممروجة

خلوقو ضايقة و كرومتو عوجة

ياللي حبيت الجوزاء اسمعها مني

راك تربح عقلك و ترقد متهني

كان جريت في حظوظو راهو يبعد عليك و يغني

و كان جريتو وراك يصبح رضاك متمني

اللي جات تحكيلكم في هالحكاية لا سمعتها في خرافة و لا قراتها في رواية

لكن طبعها و طبع هالبرج لحن لنفس الغناية

ما راتوش في المنام لكن شافتو في المراية

مخها يحوس في الهواء خاطرها باختصار برجها جوزاء