Zodiac Signs | الدلو عاشق الزهو

أيا سيدي نرجعو لمخ هدرتنا و عالأبراج نعاودو نبسطو سيرتنا
و اليوم خرافتنا عاللي برجو بالدلو اللي يشيخ عالطرب و يعشق الزهو
دمو بااارد و رزين و كانو ذكر عالمرا الذكية يحط العين
و كاني أنثى راي للات الأناقة و الزين
حداث و لسانو مطلوق و اللي يقصدو عمرو ما يرجع محقوق
منظم و نظيف و ديما مهندم ربيع شتا و لا حتى خريف
الدلو يا سيدي معدل عالهوا يعني أكثر مالإيه باش يقللك لا
راسو لا يتكسر لا بفاس و لا بعصا
و اللي يقللو عليه مخو يقللو on y va
قلبو معلق في سابع سما و ما ترفعو لا أرض و وطا
يحب يجنح و يطير لماح و عمرو ما يحير
شعارو في الدنيا  خليني نزدم و اللي يصير يصير
اسمو على جسمو مرة فارغ مرة مليان
مرة تظلام الدنيا في وجهو و مرة تزيان
واضح و اللي فما فما في حظورو الحقيقة تتوضح و تبان
و أكيد ما عندوش للنفاق مكان
أصحاب الدلو الجوزاء و الميزان يشيخ معاهم و يرا الدنيا بالألوان
الحاصل الخرافة عالأبراج مازالت طويلة و جماعة الدلو بالذات حكايتهم جميلة
ان شاء الله أيامكم كيفكم ظامرة و حلوة
و عمرها ما محبة الناس فيكم لا كانت بالقوة .