Connect with us

Actualités

رحبة الانتخابات الرئاسية : 10 نصائح قبل اختيار مرشحكم

elloumi mahdi

Published

on

[simplicity-save-for-later]

هذا المقال ماهواش تشجيع على انتخاب مرشح معين و ميشجعش زادا على عدم انتخاب مرشح، اما يشجع على استعمال شوية ذكاء و الابتعاد عن كل مضاهر البهامة بالنسبة لاصحاب القلوب الحساسة و الايديولوجيات المتعصبة و يا حسرة على بن علي و الجماعة اللي يخافو ربي .. انتم ما ينفع فيكم شيء نتمنى فقط نهار الانتخابات تصبحو راقدين للستة متع العشية و الا يجيكم اسهال حاد تتحصرو في بيت الراحة خلي نرتاحو منكم و من صوتكم.

ستة و عشرين مترشح يتنافسو على رئاسة الجمهورية اشكال و انواع على كل لون، و مهمة كل واحد فينا انو يختار الانسب باش يقود بلادنا ..اختيار ينجم يتحكم في مستقبلنا و مستقبل صغارنا لذا فالحكاية موش لعبة، و اللي مينتخبش لازمو يعدي الخمسة سنين الجاين ساكت لا تذمر لا بكائيات. و اليوم و في وسط المعمعة و الحملات و المناظرات حبيت نقترح عشرة نصائح بديهية قبل ما تختار مرشحك:

الاعلام ينجم ينتخب في بلاصتك

كي تحل التلفزة تلقى اعلامي شاد حبس على الفساد يحاور في واحد محكوم عليه في قضية تهرب ضريبي و جايب كرونيكور واخو عفو على قضية تحيل و ينجمو يخرجولك تونس في نهار تشبه للصومال و غدوة تولي سان فرانسيسكو، تأكد انو الاعلام عندو رأي معاك لذلك سيدي المشاهد نحبك فطن و ميتعداش عليك .. مافيها باس كي ما تنساقش ورا اللي تتفرج فيه في التلفزة منغير متخمم في الموضوع قبل.

الشعبوية و العياذ بالله

الشعبوية مرض و تقريبا الكلهم مرضى بيه و هاني باش نعطيكم العوارض متاعو : تكرير كلمة الزواولة في كل جملة و الحديث عن المنسيين و الفقراء كأنك واخذ تفويض من عندهم و تقسيم تونس الي تونسهم و تونسنا و التهميش و احنا و هوما، و غيرو من الخطابات الرنانة اللي تكون عامة مسبوقة بزغاريد و قبل و عناق و تخرج المرشح في صورة شيقفارا تونس، خاصة كي يبدا عندو خليل تونس و أمين مطيراوي و تلك المعدات الشعبوية الاخرى.

نأسف لإعلامكم انو اغلبية المترشحين اللي كي هكا راهم موش باش يردو القصرين عاصمة تونس و خالتي مباركة تحبلها وقت باش تعبي قفتها.

احسبها مليح

في كندا فما تقليد رائع في الانتخابات و الحملة هو انو بكل بساطة يجيو يسألو المرشح شنوة مشاريعك، قداش تستحق فلوس، و منين باش تجيب الفلوس. للأسف جل المرشحين يحكيو على مشاريع اقتصادية و حلول خيالية .. المرشحين هاذم و خاصة المستقلين مينجمو يعملو شيء مغير مساندة برلمانية اغلبية، و مغير ميقوللنا منين باش يجيب الفلوس وهوني نسمعو شطحات من قبيل ايقاف الديون و الثروات البترولية و غيرها مالاحلام اللي ماتجمش تتحقق.

اعمل طلة على التوارخ

العباد اللي كانت قبل سبب في تفليس المزانية، تضخيم كتلة الاجور، انتشار الارهاب، الاغتيالات و تحول تونس اللي مرتع لجماعة بو لحية اصدقاء وجدي غنيم، ما لازمهمش يخرجولنا تو ابرياء و ملائكة و حداثيين و قريب يتصور ب بيكيني و يولي انستاغرامور باش نصدقو … لااا سي علاء.

تونس ماهياش باش تولي دبي عام الجاي

نأسف لإعلامكم انو ناطحات السحاب و البنية التحتية و تطور الادارة و التعليم و الصحة و النظافة موش باش تصبح مبعد بنهار مالانتخابات تلقاهم … نبعدو شوية على الخيال، صحيح لازم برنامج طويل المدى اما نحاولو نركزو مع العباد اللي تعطي في حلول واقعية لمشاكل قريبة. و تأكدو انو دون ثورة عقليات رانا معنا وين نوصلو حتا كان يحكمنا تشرشل.

لا للزغاريد و المحفل و التراث النوفمبري و يحيا هاضاكا

تو صحيح احنا شعب نموتو على الشطيح و الطبل و الزكرة و برا اكاكا و عنا حنين غير عادي لكل ماهو قديم، و بالنسبة لينا الوضع قبل خير و قبل الفرحة و البركة و الخير و تحس تونس كانت النرويج و بن علي يسخف و غلطنا في حقو. اما اليوم كي نشوف المرشحين مصففين يقنعو في الشعب و تصويرة كلها كرامة و همّة، نرحم على والدين ثورة البرويطة.

جزار يعضم على مراقزي

لا هاكا ضحية لا هاكا بطل، كلها حسابات و كلها تخدم … المطلوب شوية ذكاء، فما عباد شدت السلطة قبل و عملت حوايج، و فما اللي معمل شيء و جاي تو يحب يبدل، و فما اللي مكانش ينجم يبدل شيء، وفما اللي يضيع في الوقت.

الوهرة الزايدة تعمل الامساك

« آه مالا اهم حاجة الوهرة و يكون هاكا مرشح بلدي و فخامة و زين » … بربي رانا ننتخبو في رئيس موش في ملك جمال تونس، نحبو انسان قريب للشعب يتكلم مغير متحس انو السينيال قص في التلفزة و ينجم أي صحافي يهنتلو و ديما يمشي و لاباس.

لا للمقلد لا للمذرّح

لا لمرشحي المجالس العليا و الاستراتيجيات العميقة طويلة المدى المنبثقة عن ابستيمولوجيا الفعل البراغماتي، لا لمرشحي الشعشوعي و السلعة المضروبة جماعة ديمقراطية سايس خوك و لا للمساواة خاتر الشعب ميتقسمش و عاداتنا و كل.

تستاهلو

الكرة عندكم كان اخترنا واحد يشرفنا و يخدم البلاد بالفعل نستاهلو الخير و التطور، كان اخترنا واحد مالحبيبات يمرمدنا و يعمل بعمايلو نستاهلو الفقر و الميزيريا و الهم.

دمتم و دامت انتخاباتكم و افراحكم و حريتكم.

Share your thoughts

Actualités

طلبة الطبّ بالمنستير يقاطعون العودة الجامعية

Mohamed Ali Slama

Published

on

[simplicity-save-for-later]

يحبس العالم أنفاسه في الآونة الأخيرة منتظرا تطوّرات الحالة الوبائية. فيم أحرزت تونس نجاحات عدّة في التصدَي للجائحة. وعلى وقع هذه النجاحات, كانت للدولة عدّة تحدّيات, أبرزها آليات ما بعد الكورونا.

بعد أن تمّ الإعلان عن نهاية السنة الدراسية بالنسبة للتعليم الثانوي والإعدادي والإبتدائي, ظلّ أبرز تحدّ هو العودة الجامعية, القطاع الذي يضم أكثر من مائتي ألف طالب موزّعين على كامل الجمهورية. مثّلت ظروف عودتهم, وتفاصيل إستكمال السنة الجامعية محلّ خلاف كبير بين الطلبة وهياكل التسيير في عدّة مناسبات.

في إطار هذا الزخم, أعلن طلبة كلّية الطب بالمنستير من خلال بيان للمنظمة التونسية للأطبّاء الشبّان مقاطعتهم للعودة الجامعية والدورة الرئيسية الحضورية للإختبارات الكتابية ورفضهم للرزنامة المقدّمة من قبل الكلّية. وعبّر البيان عن مطالب الطلبة في عودة جامعية وفق رزنامة تستوفي شروط تكافؤ الفرص وحق الطلبة في فترة مراجعة تكفل لهم إجراء إمتحانات الدورة الرئيسة في ظروف معقولة.

أقرّت الرزنامة المقترحة من قبل كلية الطب بالمنستير إستئناف للدروس الحضورية يوم 18 ماي, الأمر الذي إعتبره الطلبة مخالفا لإجراءات الحجر الصحّي الموجّه في مرحلته الحالية, ذلك أن التنقّل بين المدن لا يزال مقيّدا. كما أعلنت الكلّية أن فترة المراجعة قد أنطلقت بالفعل قبل يومين من تاريخ الإعلان عن الرزنامة أي يوم 11 ماي. وهو ما أعتبره الطلبة إنتهاكا لمبدأ تكافؤ الفرص.

عبّر الطلبة في بيانهم أن برمجة دورة التدارك قبل موفّى شهر جويلية, أي بعد أيام قليلة من الدورة الرئيسية ستمثّل لهم إرهاقا كبيرا وتهديدا لصحتهم الجسدية والنفسية, بما في ذلك من نسق حاد مجتمع مع ظروف خاصّة تشهدها البلاد وسائر بلدان العالم.

وأكّد الطلبة في رسالة مفتوحة إلى السيد وزير التعليم العالي, أنّ التوقّف عن الدروس بشكل فجئي لم يمكّنهم من إستخراج ما يحتاجونه من وثائق للمراجعة والإعداد للدورة الرئيسية, وهو الذي يجعل من فترة الحجر الصحّي الشامل فترة إنكبّ فيها طلبة الطب على معاضدة جهود مكافحة انتشار الحالة الوبائية, لا فترة مراجعة. وطالبوا في الأخير ببرمجة تدارك حضوري للدروس مدّته أسبوعين إبتداءا من تاريخ عودة النقل بين المدن, بالإضافة إلى فترة مراجعة مدّتها أسبوعين يتمكننون فيها من الإستعداد للدورة الرئيسية في ظروف طيّبة, على أن تكون دورة التدارك في شهر أوت أو سبتمبر المقبلين.

Share your thoughts

Continue Reading

Made with ❤ at INSAT - Copyrights © 2019, Insat Press