Connect with us

Series of stories

أنساطير | قصّة الغابة

Avatar

Published

on

[simplicity-save-for-later]

قلنا عاد أكا الأرض المنحوسة، والسرايا لي نڨرت حيوطها السوسة، قعدت في مخاخ العباد .. تي ماي مالجن محروسة ..

وطار الخبر في البر، الباي وعايلتو ماتوا والجيش تنحر وقبلهم أكا المسكين قتلو زميم الجن بعد ما في الذهب نحر، الخبر وصل عاد لقائد عظيم من أحفاد سليمان، ومازالت في مخو عظمة جدو وكيفاه تحكّم في الجان، عاد حضر روحو وشد الثنية وحط في مخو الرواية، وحلف بوالله ما يرجع إلا ما يفهم الحكاية ..

وسمعوا الجن وتكبسو وخافوا، راو حفيد سليمان جاي، وهذا لاهو أكا القلّيل الي قتلناه ولاهو الباي ..

وتلموا الجنون في حلقة، لازم يلقاو حل يخرجهم من الورطة .. وكثرت الآراء واختلفت، كانك على جنون الضو ماو أغلبهم مسلمين .. قالو نسالموه وعلينا نحكّموه، وتنطرت جنون النار من غادي زميمهم إبليس قالوا نحاربوه، وكان نجمناه نقتلوه .. أما عاندوه بقية العبابث والجنون الفانين، وعلى رأي جنون الضو قالوا ماشين ..

تغششوا جنون النار وقام إبليس وحب يفرض رايو الرجيم، وقاوموهم بقية الجنون وسلسلوهم وبقا السؤال فين نخبيوهم ونكتفوهم ..

وتفكروا إلي وقت نصبوا القصر، خلاو بلاصة خضراء، غابة كلها شجر .. قالو نكتفوهم في وسط الغابة، ساقيهم في وسط العروق ماللوطة، ومالسما هبط الحديد تكتفت بيها وذنيهم مالبلوطة ..

وصبحت الأشجار لي بحذا السرايا الكل مسكونة، والشجر الكل يتنفس و يتحرك كل ما إبليس يعيط والجنون الصباح يقومو والشجر تتخيّط .. أما الي ما يعرفوهوش هو أنهم قاعدين يتمددوا كل يوم من شيرة الجذور، ويقدموا لقاعة السرايا كل شهور، ويا نهارة الي تتنقب القاعة و يتحرر الي ما يتسماش ويخرجو المردة والعبابث وجنون النار، وتصبح السرايا ما تتقربش وعلاها ما يتحكاش.

Share your thoughts

Continue Reading

Series of stories

قصر الحكومة بالإنسات | المعارضة

Avatar

Published

on

[simplicity-save-for-later]

By

يا سادة و يا مادة يدلنا و يدلكم على طريق الخير و الشهادة.
كيما نقولوا قبل كل حكاية، كي تقرا نحبك حالل مخك مش حاير و تخطف المعنى وهو طاير.
يا حسرة كي كانت أكا الأرض مسكونة و يا حسرة كي كانت حيوطها سخونة… توا في 2080 أرض الجنون المشومة ولات أرض العلم و القراية الدمدومة و ملي ولاو كبارات البلاد الكل يخرجوا من غادي صبحت قصر السلطة و الحكومة، وقرارات البلاد ولات تتاخذ من غادي و الوزرة داخلين خارجين شي عادي و اسمع يلي ماتسمعش : مقر الحكومة صبح في الإنسات و وزرة البلاد غادي قرات.

عاد فتكم بالحديث، عام 2079 تشكلت أول حكومة إنساتية و تم الموافقة عليها من طرف السلطة التشريعية.
و كيما أي حكومة ناجحة و فيها كفاءات لازم تلقا ناس فساد تحب تطيحهم و تحب تبقا من البلاد تقتات.
لوبيات البلاد المرة هاذي تلموا و عملوا في الإنسات عمارة و سماو رواحهم اسم جديد : سماو رواحهم الإدارة.
يحكيو أنو المعارضة الجديدة حبت تعمل للحكومة مكيدة وتخلي البلاد على الازدهار بعيدة أذاكا علاه سكّروا برشا مؤسسات عمومية و ولّاو يكريو فيها للحكومة بالمناسبات تقول وطيّة و طلبوا مقابل بقية المؤسسات زيادة في الشهرية.
و يقولوا زادا أنهم حاولوا يعطّلوا الوزرة في خدمتهم : ماخلاوش وزارة الطيران تصنع طيارات و تجيب طيارين باهين و ماخلاوش وزارة الروبوتات تجيب مستشهرين من الصين و حتى أكثر وزارة تشغّل في الناس قطعوا عليها الماتريال و ماخلاوهاش تكوّن المنخرطين و كل وزارة عندها حكاية و رزمة مشاكل مع هالمعارضين.

يقولوا أنو وقتها الوزرة تفاهموا برشا مرات مع المعارضة الي شعّلت في البلاد حريقة و صحّحوا معاهم عشرين وثيقة و كل مرة كانوا يخونوا الشعب إلي عطاهم الثيقة لكن العدل عمرو ما يبطى دقيقة، و يا نهار إلي يجي و يرتّح الوزرة و البلاد من هالشقيقة.

Share your thoughts

Continue Reading

Made with ❤ at INSAT - Copyrights © 2019, Insat Press