Dwayne « The Rock » Johnson

مرحبا بيكم الناس الكل في article جديد،

اليوم بش نحكي على شخصية الناس لكل تعرفها وحتى كان متعرفهاش راي راتها مرة في التلفزة اما برشا ميعرفوش قصة حياتها، الممثل الأعلى أجرا في العالم

اليوم بش نحكي على The rock: Dwayne Johnson.

ذا روك هو ممثل منتج ومصارع متقاعد من مواليد 1972. وفي عام 2016 الايرادات متاعو وصلت الى ما يقارب 64.5 مليون دولار الي خلاه  الممثل  الأعلى أجرا في العام اذاكا.

من صغرتو ذا روك كان مقدرلو انو يطلع مصارع، جدو كان مصارع وبوه بعدو روكي جونسون كان مصارع، وهو الي درب ذا روك كي كان عمرو 16 كان طولو 1.93 ويوزن 102 كيلو. ماكانش عندو برشا صحاب .. وكان كل ما يسئلو استاذ على عمرو يطلب عليه البطاقة المدرسية بش يصدق و صحابو  مكانوش يحكيو شي قدامو، كانو خايفين ليطلع  شرطي متخفي.

دواين كان يعمل في المشاكل وكان بش يبطل القراية لين جاه نهار استاذ قالو متحبش تلعب كورة نستحقوك تنجم تعاونا قال اي شعندي نعمل. من وقتها دواين لقا حاجة يحبها ويحب يعملها وعمل صحاب وكمل في المدرسة متاعو و مع الجمعية متع كورة القدم الامريكية.

مبعد دبر منحة لجامعة ميامي وين لعب غادي حتى لين تخرج بعد التخرج ولى لاعب كرة قدم امريكية محترف ولعب في الدوري الكندي اما بعد شهرين بطل

المصارعة.

ذا روك كلم بوه قالو راني نحب ندخل في المصارعة قالو بوه سيب عليك اك تشوف انا وجدك عدينا عمرنا كامل في المصارعة وماعنا وين وصلنا، قالو بابا انا حاسس اني نجم نعمل حاجا يا اما ترانيني يا اما خليني اتو نشوف حل، قلو بوه باهي منخليكش وحدك الثنية صعيبة.

ذا روك نجح في المصارعة وكان واحد من اعظم المصارعين على مر الزمان.

كان اول واحد خذا لقب الوزن الثقيل 8 مرات واول ما بدا كان اسمو روكي مايفيا. روكي اسم بوه ومايفيا اسم جدو اما مبعد بدلو لذا روك

وعام 2000 كتب سيرة الذاتية متاعو على شكل  كتاب الي حقق اعلى مبيعات وقعد في القمة لعدة اسابيع.

التمثيل:

شهرة ذا روك في المصارعة هي الي خلاتو يدخل للتمثيل. اول مرة مثل فيها عام 1999 وين جسد شخصية بوه في حلقة من برنامج تلفزي

« StarTrek: voyager » وبعدها بعام عيطولو كضيف شرف في حلقة وين جسّد دور مصارع فضائي.

مبعد شارك ذا روك في اول فيلم ليه وين خلُص 5,5 مليون دولار وهو اعلى اجر  للممثل في « the mummy returns ».

مبعد شارك في  « The scorpion king, the game plan, the rundown » و ولا وجه معروف في التلفزة وديما يعيطولو في الافلام.

الا انو ذا روك موقفش لهنا، زاد حل شركة متاع انتاج واخراج افلام سماها « Seven Bucks Production » الي في عام 2017 خرجت زوز افلام  Jumanji:Road to the jungle و Baywatch .

وفي عام 2016 صحح بش يخدم Gym bag وين خدموا و مراويل وفاو من الجمعة الاولى الي هبطوا فيه »Project Rock: Under armor ».

شهرة ذا روك عاونتوا برشا وخلات لعباد تحبو رغم الي برشا حاجات تبدلت في حياتو نجمو نقول انو نجح في كل حاجة عملها. اكثر من هكا ذا روك بطل من الكرة القدم الامريكية ودخل في المصارعة الي هي كانت مش مضمونة وزيد دخل في التمثيل الي هو بعيد عليه الا انو كان واثق من روحو و تبع الحاجة الي يحب يعملها.