Connect with us

À vos plumes

5 سنين أما تعداو في رمشة عين

Published

on

كل حاجه في الدنيا هاذي لازم توفا
تطوال، تقصار، توخر ايه.. اما توفا
وانت عاد عينك ميزانك، شنو تتفكر وشنوا تنسى
واليوم كتبت خاطر نخاف لا ننسى
وحتى كان نسيت نحب تتفكر كل شي من جديد
كل ضحكة و كل تبسيمة
كل تفدليكة وكل تحليڨة
كل ركشة في les bancs ولا في ال hall
وحتى كيفاه كنت نضيع بين les salles
كل فصعة و قهوة في البراكة ولا toutous
اه وقبل عاد لازم تتعدى للـfriandises
كل تصبيحة على projet
كل compte rendu وكل TP
تي حتى العساس كي يطردنا في الليل
ويطلع يدور في الـsalle de lecture بالـpile
وستورة الباهي، كي تقلو صباح الخير
وطرح الـloup garou ولا الـbelote
وزرڨة والـpizza والـbuvette
تي حتى كي تبدا تلوج على toilettes
وليلة صلى الله والتصبيحات
والـDSات والـexamenات
تي ماهو جرة الـclubet
اييه قداش محلاهم الـévenemenet
والبيتان في الـfac والتصبيحات
وقداش تعلمت منهم حاجات
هه و مرج الـresultat وتهبيط النوتات
ونبيل كي يتعزز عالـaffichage
والresto نهار يطيبو دجاج
وكراسي الـamphi المكسرين
والياجور الأحمر المزيان و العرص المدورين
5 سنين تعداو في رمشة عين
فيهم ضحكت وبكيت
كركرت، خدمت وعييت
حبيت و تحبيت
اما أهم حاجة تبدلت و تعلمت
يمكن هاذي هيا كبرت

لكل عبد عرفتو في هالبلاصة المزيانة
لكل عبد وقف معايا ولا نصحني
لكل عبد فرحتو ولا فرحني
لكل عبد عاوني
وخاصة للي يتبسم كي تجي العين في العين

و لا انا نعرفو لا هو يعرفني

لأي عبد غلط معاه، بالعاني ولا موش بالعاني، سامحني
محلاكم محلاكم محلاكم، خليكم هكا
خاطر الاينسات بيكم انتم ولات هكا
كل période في حياة العبد تجربة جديدة
الاينسات بالنسبة ليا أكثر وحدة marquante.
وكان نرجع للباك نعاود نختار اينسات
ونختار نعاود نعيش كل لحظة وكل دقيقة
كل ضحكة وكل بوسة وكل تعنيقة
ما كذبوش كي يقولو الاينسات حلمة..
أما حلمة تتعاش في الحقيقة!

———– بقلم رحمة الشلّي

Like
Like Love Haha Wow Sad Angry
1410

Share your thoughts

Continue Reading

À vos plumes

عيشة الفاك

Published

on

إيجا نحكيو شوية على عيشة الفاك
أمي قالت بنتي ولات في الجامعة ومادراك
التزغريط متاعها ملا الدار نهار résultat الباك
رجع septembre ورجعت القرايا
شديت الثنية وخليت دعاوي أمي ورايا
قتلي تهنى خيالك ديما معايا
مشيت نجنح بالفرحة تمليت
قلت ما نسلم و ما نقول عيت
أيا سيدي أول جمعة شايخة وزاهية
هاي طلعت العيشة وحدي باهية
فرحت بالجو وبالصحاب
أما الحق المسؤولية بدات تصعاب
وليت نخمم في غدا و عشا
والفرنك لشكون لازمو يتعطى
ولازم نخلي على جنب مصروف الكرا
قداش ما نحسو بقيمة الحاجة كان كي نبعدو علاها
أما حتى المسؤولية عندها ناسها وأمالاها
محلاها كي تاكل حاجة انتي واقف سوايع علاها
تولي تفهم كل تجربة جديدة عندها ثنيتها
وكيما تعيش شوية في مرها، تعرف بهاوتها
توة قدامك ثنية مستقبل طويلة ترسمت و بدات
وهاك الأفكار متاع طيش الصغر وفات
تخمم تبني مستقبل تفرح بيه إنت وداركم
بش تنجح وتقلهم هذا كفوكم وكاركم
وسط الجمعة تبدى تستنى في لمة نهار الأحد
كي يجي تولي شايخ و فرحان ما كيفك حد
ما فماش عيشة فاك كان ما تكبسش القراية
وبعد ماتعديو لازم منها جملة ‘الفايدة في الصحة والنوايا’
تتعلم من غصرتك تصنع فرحتك
من ضعفك تصنع قوتك
من طموحك تصنع حلمتك

Like
Like Love Haha Wow Sad Angry
334

Share your thoughts

Continue Reading
0