اتحاد و الحكومة: زيد في الماء زيد في الدقيق

هيا سيدي مبروك عليكم القطاع العام الزيادة في الشهرية !

تعبنا عليها و ربي يدوم نعمة الحكومات الضعيفة … اشنو، حتى هوما الاخوة حارقينها خدمة و انتاجية!

و كل الشكر للأخ نوردين الطبوبي، اللي بعد ما هدد باضراب عام و عمل شوية اجتماعات عامة في مؤسسات عمومية (بالطبيعة في وقت الخدمة مافيها باس)، ركب في المرسداس تسعة خيالي و مشى طل على القصبة جابلنا زيادة ب 250 د، و قرار بعدم خوصصة المؤسسات العمومية..

يا نعيما! العاقبة للوظيفة العمومية نشالله اضرابهم في نوفمبر و لكم العاقبة في الافراح و المسرات!

ايه؟ و شفيها كان نزيدو 2 مليار دينار في كتلة الاجور؟ خسارة في موظفين الدولة؟! هانا نشوفو في الادارات يا ما شاء الله، تقضي قضيتك من قبل ما تعتب الباب.. تلقاهم يستناو فيك يحشموك على روحك بالحرفية و حب العمل!

والا المؤسسات العمومية.. بكلها تخدم و تصور في الفلوس بالمشطة، و الخدامة مسيكنات يخدمو نهار و ليل و جوّهم فسفس كيما قال صديقنا.

و الميزانية شعملنا فيها؟ هاو حكومة يوسف، قلب الاسد، اشجع و اجرء رئيس حكومة في العالم، قلك هانا نحوسو في عجز ب 20 مليار و متسلفين يجي 10 مليارات لازمهم يخلصو، و نشالله تو عام الجاي نتحسنوا و ربي يقدر الخير…

تي ماهو عاد عام الجاي انتخابات، و مفما حد يساعدو انو تقوملو احتجاجات و عياط و زياط الايمات هاذي، لذا فخلينا نزيدو في الشهاري و منزيدوش في الضرائب و نجيبوا كراهب شعبية مدعمة و سيارات ادارية… اي كهو وخلي الوزارات تصرف و تستورد في اللي يجي، المهم تعدي هالنهارين و تو كي يجي اللي بعدنا يعمللنا هاك البكية متاع العادة، و شوية الريق متع « تركة الحكومات السابقة  » والسلام.

انا حقيقة بأمور اقتصاد مخي تكوخر و مفهمت شي، زعما احنا دولة تميل للاشتراكية و الا للرأسمالية؟ و شبيه الاتحاد ميدافعش على العمال في القطاع الخاص بنفس الشراسة؟ و شبيها الدولة تنحي في الدعم و تزيد في الشهاري؟ و كي هي سياسة تقشف، شبيكم مازدتوش في الضرائب و نقصتو في الواردات؟!