دنيا

و تضيق عليا الدنيا
و تغفصني ترفسني
تلويلي يدي و توجعني
تخنقني تربطني
طرشقني
تفرتني
تمرمدني
نحب نلمدني بالقطعة بالقطعة و نعاود نخلقني نركبني
نحي طرف العوج من طرافي و نستويه
و الوقت ينسي
و نتعلم قلبي نقسي
نحب نصقلني
نخلي الزمان يمرمدني و يعود يغسلني
نحب نعلمني و نكبرني
و نخلق من ضلوع جروحي جوانح و نطيرني
نحب نفسخ كل حاجة تطيحني
نحب نخرجك من قلبي و نمحيك
ماعادش نحب نخبيك و لا نحب نستحفظ عليك
حبيتك محبة ام متضناشي
طريقك ضلام و ثنيتك دحسة متضواشي ساعات نحس
كلامك يدخل لوسط الجواجي و على عرش جروحي يتربع
ساعات نلقى روحي في خيالك اتبع
و مش كل الجروح بضميدة تشفى
شخص كان نجم ناخذ منك نتشى
و نعملك ضميدة
لعلا منك نشفى
و ناخذ منك اخر نفس
كي الطير المجروح
و وجيعة الكلام بصوتي المبحوح
مش كل شي يتحس يتقال
و الدنيا عمرها ماكانت كلام
الدنيا افعال
و شخصني كان جيت طرف صلصال
لانعرف محبة و لا نعرف نخبي كلام
و ساعات نشوفك فطرف احلام
نلقى روحي تجريلك
تحب تبوسك تشمّك تحكيلك
ساعات و ديما و النهار لكل
توحشتك..