شنوة صار؟: عاجل تونس تهز كأس العالم في الحنكة السياسية و تقنيات التوافق

Ante-scriptum: Tous les articles paraissant dans la rubrique « Politique » ne reflètent pas nécessairement l’opinion du club.

فما زوز كوارث صارو الايامات هاذي : الكارثة الاولى هي الفيضانات في نابل، و بما أنو حكينا عليها في الأرتيكل متع الجمعة اللي فاتت، قلت خلي نحكيو الجمعة هاذي على الكارثة الثانية :خطاب الباجي.

أيا سيدي للي يحب يوسع بالو معايا شوية، خنحاولو نفهمو شصاير بالضبط : الباجي قلك الإنتخابات باش تصير في وقتها ! لا بارك الله فيه و في مزاياك سيدي الرئيس ! و قلك زادا هاكا الطفل يوسف موش باش نحيه، هاوكا كان حب يخرج يتفضل.

ايه شنو آخر؟ قلك نداء تونس مانيش باش نتدخل فيه، و ولدي حر يعمل آش يحب. للي معندو حتي فكرة شصاير في نداء تونس، الحزب متجه نحو التفكك بعد ما سي حافظ استولى عليه بلغة نلعب والا نحرم، و فقد أغلبيتو في مجلس النواب و الكثير مالقواعد متاعو …

سي الباجي زادا قلك أنا قصيتها مع النهضة، و سيدي الشيخ معادش يلزمني. و هوني الخوف كل الخوف أنو تصيرلو كيما صار لبرشا عباد يقصوها مع صاحباتهم، من هنا يجي الصيف الجاي يلقاوهم تحولو جملة و يبداو واكلهم الندم و الحيرة.

أما بالنسبة لحزب سيدي الشيخ، فكالعادة يمارس في تقنية الأرملة السوداء اللي معينهاش في الحكم و موشي معا هاضا و موشي ضد هاضاكا .. هاوكا بعض الساعات تغور على حزب تتوافق معاه و متسيبو كان كي يطلب فريّش.

أما الجبهة جاتها بهجمة معاكسة متخيبش .. قلك آسيدي النهضة عندها تنظيم سري، و داخلة في إغتيال الشهيدين بلعيد و البراهمي. الحكاية معقدة شوية و موش واضحة، أما ذكرتني في توارخ الإخوان في براكة الساحل و فندق المنستير و غيرها .. تطلعشي الحجرة ما تذوب و حزب سيدي الشيخ ما يتوب ؟

في اللخر، و بعد ما كسرتلكم راسكم بحكايات السياسيّين و الجو المنحط للسياسة في تونس، نحب نعطيكم حل هايل : هاو جايين إنتخابات العام الجاي، نحيو السياسين التوانسة الكل و نستوردو تشكيلة ماليابان و إلا الصين !

و ديما خليو عندكم أمل كيما يقول الشاعر صديق البجبوج :

« مالك تهيم بالسماء و في السماء غيومُ… اِحمد ربي و اُسكت لا يتعدى نهارك مشومُ! »