عايش فى خيالى و ضايع | الجزء 2

بعد ليلة ميؤوس منها و مانعرف حتى شى على العالم الخارجى، قررت نكون معاهم باش نضمن الحياة بالك نفيق مالى أنا فيه. طلعت الشمس و نسمع فى حراس الجيش « تزركا » فى الثنيا فيـــــــقووووووو !!!!

خرجنا مالثكنة بالسلاح و ما نعرف حتى شى ! شنعمل؟ وين نمشي؟ مع شكون نحكى؟ وين ناقف ؟؟؟

الحاصل جريت مع الجارين وقفت مع الواقفين، و نسمع فى إسمى فى أول الصف .. السيد طلع جنرال برتبة وزير يعيطلى.

– أنت هو ؟

– إي أنا هو

– و شتعمل لهنا ؟

– حتى أنا و الله مانعرف

– تتكومك ؟

– لا حاير

– منين جيت و كيفاه ؟؟

– لقاونى راقد على حرف الشط، أما منين جيت الله و أعلم فقت نلقى روحى فى وسطكم

– شكون إلى جابك ؟

– جندى إلى بجنبك

– قالي على كل شي، و حسب الأسطورة منقذنا باش يجي مالبحر ..

– الأسطورة قالت المنقد باش يكون راقد عالبحر ؟

– الأسطورة ماتكذبش، و المنقذ معاه مليون جندى و سفن حربية

غزرت عالليمين و عالليسار و قوتلو :

– حسب خبرتى و قرايتى ماكانوش راقدين معايا مليون جندي، متأكد أنا هو ؟

– حسب الأسطورة المنقذ باش يتكومك كيفك أنت و مبعد إخرج إلى عندو الكل و إحارب الأعداء

– أفحمتنى بكل ديمقراطية يا جنرال , و شعملنا تاو ؟

– هاك بديت تجي للرسمي , أدخل لغرفة العمليات

– علاه ؟ لباس؟ علاه باش نعمل عملية ؟

– يا مسطك يا بهيم يا جحش، غرقة العمليات التابعة للجيش باش نخطو فيها

– حاضر جنرال، هاني ماشى جنرال

مشيت مع الماشين و نخمم و نكمبص و نحلل، و لقيت من الأحسن اني نتقن دور المنقذ لا ترصيلى نلوج على شكون ينقذني. دخلنا لغرفة العمليات، كلها أوراق و متتفهم شي، كي الراس المجنون كل شي داخل بعضو. ثم أنما و بحيث دخل واحد سمين بلحية، شلاغمو تكتف بهيم و ريحتو ناتنة  .. طلع رئيس الدولة إلى أنا فيها « خر-طر » !

مافهمت شي من اللي يحكى فيه، أما فهمت إلى هوما واحلين مع دولة أخرى و يحاربو فى بعضهم عندهم 100 سنة. و طالبين مني ننقذهم خاطر حسب الأسطورة السيد المنقذ هو أنا !! 100 سنة يحاربو و حايريين جاو ليا أنا باش نلقالهم الحل ؟ رامبو أنا ؟ سوبرمان أنا ؟ فيتامين أنا؟

وفات الجلسة و دخلت لبيتى إلى عطاوهالى و بديت نحلل.في الاسطورة المنقذ جايب معاه مليون جندى و سفن حربية، هذا مايكون كان واحد ثائر و إلا واحد مستغني على روحو من أحباء المغامرات و الحرية و أنا حتى واحد فيهم. أنا من أحباء النوم و الماكلة و الزوز ماجيبوش مليون جندى و سفن حربية !! مممممممم .. ليلة تعدات زرقا و ما جا الصباح كان ما روحى طلعت ..

بوم طاف غرباع طـــــــــــــــــــــــــــــــــــــاف….فيقوووووو جيش دولة « بقدونس » يضرب فيقوووووووووووو…

**يتبع**

بقلم حسام حسين