Tunis Business School التوجيه الجامعي

عسلامة الناس الكل و مرحبا بيكم، اليوم بش نفسرو مبعضنا شمعناها TBS.

هي الجامعة التونسية  العمومية الوحيدة اللي تقري باللغة الانجليزية، الوحيدة الي نظام التدريس متاعها امريكي، و الوحيدة اللي تقري 4 سنوات و ديبلومها « Bachelor of Science in Business Administration ».

1- حكايتنا كيفاه بدات :

معهدنا هذا يا سيدي مازال جديد  و عملوه خاتر فما شركة امريكية اكثر من معروفة اللي هي « McKinsey »، عملت دراسة و قالت تونس لازمها تقري الاقتصاد باللغة الانجليزية، و وقتها تبنى المشروع هذا في بير القصعة بحذا marché de gros في بلاصة فارغة و شعبية و قدامها مركز امن و fast food   ….  المشروع عمرو 8 سنين ورغم هذا حقق برشا انجازات و عمل برشا استثنائات في مدة صغيرة، و سكورو طلع و كل عام يزيد خاتر الفاك قاعدة تتعرف وعقلية  ال business  قاعدة تتنشر…

2-السكور و الاختبار :

 المعهد اسمو بالعربية المعهد العالي للأعمال، تلقاووه في الصفحة 42 من دليل التوجيه الجامعي و السكورات كالتالي :

– شعبة الرياضيات : 103 مقاعد | سكور 150.10

– شعبة العلوم التجريبية : 62 مقعد | سكور 161.95

– شعبة الاقتصاد و التصرف : 21 مقعد | سكور 141.87

– شعبة علوم الاعلامية : 21 مقعد | سكور 128.13

السكور تحسبو بطريقة خاصة، تجمع سكورك العادي + عدد الانقليزية اذا كان اكثر من 15  + عدد المات اذا كان اكثر من 12. كان جبت أقل من 15 في الانقليزية و الا اقل من 12 في المات ماتنقص شي.

 قبل ما تدخللها تعدي اختبار في اللغة الانجليزية، اختبار كتابي بسيط بش يتأكدو اللي انتي تفهم الحد الادنى من الانجليزية، و اذا تجيب فيه 20/10 تنجح. نسبة النجاح عمناول 100%، كان ما تنجحش في الاختبار يتعداو للاختيار اللي حطيتو بعد TBS كان خلطك سكورك بطبيعة، و هذي قائمة بسكور TBS في 2016، 2017 و 2018.

3-القراية، الماستار و الدكتوراة :

نقراو 4 سنين و نتحصلو على شهادة « Bachelor of Science in Business Administration ». العامين لولانين جذع مشترك، الناس الكل تقرا برشا حاجات في دومانات مختلفة. في العامين الثانين تختار زوز اختصاصات، اختصاص اساسي و اختصاص ثانوي و هكاكا فرصة العمل و الدراسة متاعك تزيد.

 المعهد فيه 6 اختصاصات :

– Marketing

– Finance

– Accounting

– Business Analysis

– Information Technology

– International Political Economy   (ممكن تتنحا على خاتر الاختصاص هذا موجود كان في TBS في تونس الكل و الأساتذة شويا )

و فيه 3 ماستارات :

– Management of Ngo : appliqué

– Master of science in International Trade and Finance : recherche

– Business Analytics : recherche

و دكتوراه وحدة :

– Phd in Business Analytics

الدكتوراه و الماستار قاعدين يزيدو بالوقت و أكثر تفاصيل تلقاوها في دليل المعهد.

4- scholarship :

القراية بالنظام الأمريكي تسهلك انك تلقا برشا scholarship وبش نحكي على نوعين منهم :

-النوع الاول اللي انتي تعمر فيه application و interview  وكان تقبلت تمشي، ديما نسبة كبيرة من العباد اللي تتقبل تكون من المعهد متاعنا.

-النوع الثاني يتمتعو بيه اللي يجيو اللولانين حسب المعدل، المعهد يوفرلهم برنامج تبادل مع ألمانيا و تكونلهم فرصة باش يعديو semestre البرة بلاش.

5- التكوين و سيستام لقراية :

التكوين ممتاز و يتبع مناهج دراسية امريكية  و لكن سيستام لقراية الامريكي جديد علينا : معدلك النهائي اللي تتخرج بيه هو مجموع معدل كل الأعوام السابقة و هذاكا علاش لازم تنجح في الماتيارات الكل. العدد على 100 ومعدلك على 4 ( مش على 20 )، وملازمش معدلك يطيح على 2/4 اكثر من ثلاثة مرات ورا بعضهم، هكاكا يولي فما risque  انك تخرج من المعهد و تبدل  ISG  و لا ESSECT.

الاساتذة كيما في اي جامعة فما الباهي اللي يحبك في القراية و يعاونك، و فما الخايب من ناحية التكوين و من ناحية اللغة.

5-الخدمة و الافاق :

أكثر سؤال يجيني : شنوة نطلع بعد ما نقرا؟ و شنية الخدمة؟ و قداه نخلص؟

شهادة bachelor هاذي اللي تاخوها بعد 4 سنوات تعادل 3 سنوات إجازة + عام ماستار في spécialité متاعك، يعني تكمل كاينك قاري مستوى اول ماستار في اختصاصك.

وراك كيف تقرى في كليات الاقتصاد IHEC أو TBS أو ISG لا تخرج طبيب و لا مهندس و لا محامي، و لكن حسب توجهك و اختصاصاتك نجمو نسميوك

Manager , comptable  ,financier … انواع و اسامي الخدم اللي موش معروفة في تونس  تلقاوها زادة في دليل الفاك.

نسبة البطالة في tbs  هي 0 %  تقريبا .. الناس الكل تلقى خدمة  حسب إحصائية IACE لسنة 2018  و في مدة اقل من شهر. الخدم  باهية و الشهاري ديما تفرق خاتر مش الكل كيف كيف، فما اللي يرضا بشويا فلوس و بعد يطور و فما اللي يبدى قوي ملول وتتراوح شهريتو بين 700 و 1100 دينار، و توصل حتى ل 1400 دينار (  و نذكر اللي الأجر هذا تاخذو من دون ادنى خبرة  راهو !!! و من بعد يتطور حسب الخبرة ).

برشا زادة لقاو فرص في الخارج بفضل اللغة الانجليزية، علما وانو الفاك تخلص على الطلبة في اخر العام اختبار IELTS اللي قيمتو 400 دينار، وتعمللهم تدريب بلاش قبل الإختبار مما يسهل فرص القراية و الخدمة البرة.

6- الجمعيات :

تعتبر فاكنا من انشط الفاكات في تونس كمًا و كيفًا، فيها اكثر من 20 club و نلقاو برشا events على مدار السنة. كل اربعاء عشية مخصص للأنشطة هاذي و سعات تلقا اكثر من event  في نفس الوقت. الEvents هاذم فرصة باش تقابل عباد و تعمل علاقات ربما تكون هي سبب من اسباب نجاحك …

اخيرا، ( سامحوني طولت عليكم ) الفاك لازمها برشا تفسير و برشا details اخرينا، تلقاوهم موجودين في الفيديو هذا :

اي سؤال تنجمو تطرحوه على صفحة UGTE TBS أو قروب التوجيه الجامعي 2018 Orientation Universitaire

ان شاء الله ربي يوفقكم و ان شاء الله نشوفوكم  متخرجين بحذانا ❤