عيشك

عام.. و برشا كلام
عام.. وبرشا حب.. وملام
عام.. وبرشا برشا أحلام
عام.. وشاحت الأقلام
عام.. وما عادش فيها القدام
عام… حلمنا برشا أحلام
اما رد بالك تصدق الأحلام..
رد بالك تصدق الوعود والكلام..
12 شهر…
12 شهر.. تعداو تقول عمر..
12 شهر شفنا فيهم بارشا حلو وبرشا مر..
زعمة يغلب الحلو المر؟
زعمة بالحق اللي يحب يسامح وينسى القهر؟
زعمة ساهلة يزي.. ما توصلش للقبر؟
زعمة تنجم تنسى اللي نهار قلك انتي القمر؟
تنجم تنسى اللي تراه قدامك كل دقيقة.. في البر و في البحر؟
وعلاش ؟.. هذا الكل زهر؟
ولا فما مشى وسلم و شكون صبر
ياخي لازم نفهمو كل شي؟
لازم يطلع فما شكون غالط ولا شكون غدر؟
لازم نضيعو وقت في المشاكل و القهر؟
لازم نحسوها تطييح قدر؟
موش يقولو اللي يحب يسامح وينسى و يرمي في البحر؟
ولا كل شي ينجم يطيح ويموت كي وراق الاشجر؟
حاصيلو..
365 يوم..
فيهم اللي تعدا حلمة و فيهم اللي حموم..
تتفكر سيدي بو سعيد واللاك و المشموم؟
تتفكر المدينة والفاك و اول ربع ساعة وراسي على صدرك مضموم؟
تتفكر لشكون كنت تجري كي تحس روحك مهموم؟
وتوا دارت الدنيا وتبدلت الهموم..
وجيعة و كسوحية رأس و خشم  و برشا سموم
قلنا سحابة صيف.. ولا ريح حسوم
اما طلعت السبب اللي باش يخلي كل واحد فينا يعيش محروم..

عام.. بالباهي و بالخايب.. بالوقت اللي ضيعناه نتنابزو..
كان نرجع لتالي نختار نعاودو
و ما نشكش لحظة في نقاوتو
عيشك.. على كل ضحكة و تبسيمة
عيشك.. على كل لهوة و تكليمة
على كل رد بالك على روحك و نهارك زين
على كل بوسة و تعنيقة وغزرة حب من هاك العينين
على حبك.. و قلبك اللي كان حنين..
عيشك خاطر علمتني.. علمتني نعيش و ما نضيعش لحظة مع اللي نحبو
علمتني اللي السماح كلمة غالية.. وقيمة اللي يسامح ديما غالية
علمتني اللي اللي يحب يسامح وينسى.. موش يحاسب و يزيد يجرح
عيشك.. و لو بعد عام..  عيشك.. :’)
وانتم.. ما تقولوهاش بعد عام.. حبو بعضكم و قولوها بالقوي ما هياش عيب.. بالعكس.. قولوها و افخرو بيها.. ردو بالكم على بعضكم.. خاطر ما تعرفوش شتنجمو تخصرو..
موش كل نهار تحب و تتحب.. وموش اي واحد يحب..
« الحب للاقوياء فقط.. الضعفاء تزوجهم أمهاتهم »