مائة حاجة فيك

سميتها 100حاجة فيك..
سميت حكايتنا على اسم غنايتنا..
غنايتنا الي تخليني نخمم شنوة حبيت فيك..

منين باش نبدا و منين باش نوفا؟
نبدا من عينيك الي يفرحو كي يلاقيو عينايا..
عينيك الي يحسوني الي مفما كان أنا في الدنيا..
نبدا من صوتك الي يقعد يتعاود، حتى بعد متغيب عليا، في وذنيا..
نبدا من ريحتك الي مش مفارقة يديا..
نبدا من ضحكتك الي تزين خديك و تزهيلي أيامي الي ما تسوا شي بلا بيك..

100 حاجة فيك..

قداش باش نحكي و قداه باش نخلي..
منسلمش فيك، حاجة أقوى مني..
متصورتش يجيني شكون ينسيني شقايا و همي..
و كي نفرح يشاركني البهجة و الضحكة
المرسومة على فمي..

حبيت..

حبيت الفرحة الي نحسها كي نشوفك..
حبيت الأيامات الي نعديها متوحشتك..
حبيت كل كلمة نحبك نسمعها منك..
حبيت كل كلمة « مهبولة » تقولهالي كي نعديها نلعب..
حبيت روحي معاك..
روحي الي انت حبيتها كيما هي…
حبيت كي تشاركني حتى لحظات ضعفي.. حزني.. و دموعي..

حبيت 100 حاجة فيك..

و في نهاري، حبيت نهديلك أفكاري..