تاج الحاضرة …وقت التاريخ يولي حاضر

سِيدْنا التاريخ بَاش يِشهدلك إلى انتِ أوّل من ألغى العبودية وفْرَض عْلم تونس
”عْلى لَتراك ونَصبُو قبلهم“.
هكا كانت الكلمة لولة بين الفريك بن عصمان و أحمد باي( 1837-1855 ) لي خاب ظنوا في ”العربان“ والفلاحين وبعض رجال الدين لي محترموش قرارو في إلغاء العبودية اللي اتّخِذو أواخر1846. هذة حكاية مسلسل شدنا الناس الكل بالبهرج و الفيانة و الضخامة لي فيه و كيما يتكتب في بداية كل حلقة  » استمدّت أحداث هذا المسلسل من وقائع تاريخية مع بعض التصرف والتطويع خدمة للضرورة الدرامية  » فهي حكاية بايات تونس و الحرملك في زمان ثورة علي بن غذاهم و زمان باي الشعب الصادق باي في عام 1849 , تدور الحكاية بالأساس على فترة حكم باي الأمحال أحمد باي( أداء : عزيز باي ) والناس الدايرة بيه من عائلة حاكمة و حكومة كبيرة جمعت خيار الناس من مصطفى خزندار (أحمد الأندلسي) لشكير خوجة خيل الباي (الشادلي العرفاوي ) , علي بن غذاهم (معز القديري) للفريك بن عصمان ( نجيب بالقاضي )و خير الدين باشا (ياسين بن قمرة ) … في مواجه عامة الشعب لي يجاهد باش يعيش في ظل ضروف صعبة من ضمنها ”عام البوبرّاك“ ما يعني العام لي ضرب فيه وباء الكوليرا البلاد وكيما وصفو أحمد ابن أبي الضياف  » قال لي بعض عقلاء العرب من أهل الخبرة: مات الثلثان وبقي الثلث  »…

سيدنا الباي كان عاشق ولهان في للة منانة( مريم بن حسين ) و كان عندو منها زوز صغيرات في الحلال أما سيدنا زادا ربي بلاه في صغيراتو بالوباء و ماتو وقت لي هو متخبي خايف علو روحو من الموت . و باش نسلو مايتقطعش تزوج بالعلجية  » تاجة  » ( عائشة قاسم ) بدبارة أمو للا عايشة (سامية رحيم ) بحكم انها بنية صغيرة و مزيانة و تملالو دارو . و في خظم لحظات محبة بين الباي و تاجة .. للا منانة قاومت و غريزتها الأنثوية محملتش تقبل ضرة ليها فاستغلت نفوذها حتى لين قتلتها …

نوعية النزاع هذا تجسدت بكثرة خاطر سي شكير زادا تزوج على للة حسينة(نجلاء بن عبد الله) أخت باي الأمحال … تزوج عليها بنية زين و عين أما عيبها لي هيا مش من مقام للة حسينة شخلاها مسلمت كان ما طيرتها من الدار ..

و في نفس السياق سي قاسم ولد الفريك بن عصمان(محمد مراد ) العاشق الولهان في عربية « الخديمة » (غادة شكا) و هو « يجي منو البايات يناسبو الخدم  » هكا قالت للا دوجة أم سي قاسم(مريم بن مامي ) .. عربية حبها لقاسم عطى وليد مزيان سماتو على إسم بوه أما خسارة تمرمد من دار لدار لحد ما قتلولو أمو … نلقاو زادة حكاية للة شريفة(وحيدة الدريدي) الي الفقر وصلها لسيدي بومردوم و لقات روحها سلعة بين الرجال …

هكا الحكاية و هذه شوية من تاريخنا حبينا ولا كرهنا .. نقاد شكرو و نقاد ذمو … الي قال سامي الفهري تحدى روحو و نجح و فما لي قال هذا تطاول على التاريخ …

العمل هذا جمع برشا مبدعين توانسة من ممثلين كبار كيما وحيدة الدريدي . نجيب بالقاضي , رؤوف بن عمر , نجلاء بن عبد الله , مريم بن مامي , مريم بن حسين , شاكرة رماح , أحمد باي … و زادة ممثلين شبان عطاو ماعندهم كيما أميمة بن حفصية , محمد مراد ,نسيم زيادية …. وجوه جديد كيما الجميلتين غادة شقا و مريم بوقديدة … 150 ممثل و ممثلة و طاقم ضخم تحت إشراف سامي الفهري في الاخراج بعد أن كان من المقرر عرضه في الوطنية 1 بإخراج لشوقي الماجري و إنتاج لنجيب عياد إلا أن تكلفة العمل سيطرت على الموقف لينتقل العمل إلى أيدي سامي الفهري ليتم عرضه في 15 حلقة على ٌقناة الحوار التونسي بعد ما تصور في المدينة العتيقة في تونس .عمل حمل بجمال الصورة لي فيه و سلاسة النص و إختيار الكلمات و المصطلحات المتناسبة مع العصر إضافة إلى اللباس إلى خلا بعض النقاد يعتبروه مجرد تقليد للسلسلة التركية المدبلجة حريم السلطان متناسين إلى تونس في يوم من الأيام كانت تحت رحمة العثمانيين ما يبرر تقارب الثقافات … كل هذا خلا العمل محل نقاش و خلاه زادا ينافس على المركز الأول في السباق الرمضاني في ظل الغياب الشديد للإنتاجات الدرامية تحت حجة الماديات و غياب الإبداع ؟ …
نص سيناري و حوار : رضا القحام
ملابس :ليليا اللخو
ديكور :غازي التميمي
قيافة و تجميل : راضيه حداد
مهندس صوت :هشام الطرابلسي
موسيقي تصويرية : مهدي المولهي
مدير تصوير :عمر بوحولة
إخراج :سامي الفهري
سوسن الجمني