أول مرة

أول مرة نعاود نجيك و مانحس بشي..

اليوم مشيت لهاك البلاصة لي عديت فيها 4 سنين من حياتي و حفظت كل تركينة فيها..

مشيت لمعهد الشابي..

مشيتلو ضيفة و معاش هاك الإنسانة لي تدخلو بلهفة باش تراك و تخرج دموعها على خدها..

مشيت و خطوة القدام و عشرة التالي..

ماكنتش نحب نعاود ندخلو..

على قد ما كنت نحب هاك البلاصة و كل مانرجع لبلادي نمشيلها على قد ما كرهت كل خطوة تهزني ليها..

قمت الصباح و ماعينيش باش نمشي..

فديت..

كرهت كل تركينة تفكرني فيك..

كرهت كل بلاصة كنت تبقى فيها..

كرهت الدموع لي هبطوا عليك..

بديت حياة جديدة و فسخت عالأحزان..

نحب نفرح..

ماكرهتكش..

و كيما يقولو: الإنسان لي يحب عمرو ما يكره..

صحيح حبيتك و في قلبي حطيتك..

سكّنتك جوارحي.. دخلتك في أحلامي..

أما خليتني و مشيت..

نعرف لي ماكنتش حابب تمشي..

أما هكّا ربي حَبْ..

الكلنا ضياف في ها الدنيا.. و يجي نهار و ربي يهز أمانتو..

مخيبو هاك النهار..

نهار لي جاني خبر موتك..

نهار لي عالأكتاف هزوك..

دفنوك.. و بعدوك عليا..

و تصويرتك للذكرى في حيط الليساي ترسمت..

كنت نجي نبقى بحذاك، نخزرلك، نحكيلك على موتك شعملت فيا..

نحكي على كل تفصيلة صارت في حياتي من بعدك.. نبكي شويا و نقوم..

كنت نبقى مع صاحبك و نتفرجوا في تصاورك و في كل تفصيلة فيك..

نتفكروا تبسيمتك، كلامك، خزرتك و.. و حلمتك.. حلمتك لي ماتحققتش..

حلمتك بنجاحك في الباك و رضا الوالدين..

تفكرناك في دخلة الباك سبور.. و حد ما نساك..

كبار و صغار بكوا عليك..

أما.. جا نهار و معاش حازنين عليك..

كلهم رجعوا يضحكوا و نساوك فيسع..

نا مانسيتش.. و كيفاه ننسى..

كنت ديما نحلم بيك..

نكتبلك و انت تقرا و ماتجاوبنيش..

مخيبها الموت..

تعدا العام لول..

و كنت كلما نتفكرك نبعد عالناس الكل..

ديما حزينة.. تبسيمة صفرا و ديما يمشي..

و بعد عام و نص مالوجيعة بديت ننسى..

معاش نبكي عليك خاطر فديت و تعبت..

أما اليوم و بعد أكثر من عامين عرفت لي بُعدك معاش يأثر فيا.. دخلت لهاك البلاصة و خرجت منها من غير ما نلوج عليك..

على تصويرتك لي كنت نحكي معاها..

نسيتك.. نسيت كل تفصيلة فيك..

نسيت الدموع و الحزن لي موتك خلقتهم..

نحب نفرح.. نجنّح و نطير.. تخرج مني هاك البنية الصغيرة..

و نفرح و نفرح و نزيد نفرح..

ربي يرحمك و ينعمك.. و سامحني خاطر خنتك و معاش نلوج عليك..

عاودت حياتي بعدك و حلمتي تحققت..

حبيت من جديد.. نسيت.. تجاوزت.. و فرحت..

فرحت بالحق..

و نحيت من حياتي كل حاجة تفكرني فيك..

نسيتك و معاش نخمم فيك..

بقلم إلهام محمود