ماعادش نحبك

ماعادش نحبك.. أما مازلت كي نخرج للشارع نتمنى نشوفك بالصدفة، نعنقك نشدلك يدك و نمشي..

ماعادش نحبك.. أما مازلت نحلم بيك و نشوفك في منامي تضحكلي و تقلي نحبك و نموت عليك..

ماعادش نحبك.. أما مازلت كي نشوف عبد يشبهلك في الشارع ناقف نقعد نثبت فيه و نتمنى يتلفتلي و تطلع أنت.

ماعادش نحبك.. أما كي نسمع اسمك قلبي يولي يدق في الميتين و برا عاد اش باش يسلكها وقتها. كيفاش نكذب على لي دايرين بيا و نعمل فيها مولى الدار موش هوني…
هوما يعرفوني ماعادش نحبك زادة. هوما يعرفوني ماعادش نحبك و يعرفو زادة لي يمين البكوش في صدرو.

صدقني ماعادش نحبك… أما و انا نكتب في الكلمات هاذم، جاو قدامي اياماتنا و حكاياتنا.. في لحظة سمعت ضحكتك في وذني و تفكرت كلامك و شدة يدك و غزرتك لي كانت تقويني و تقلي « ماكش وحدك، عندك عينين يحبوك و عمرهم ما يخليوك وحدك »…

ماعادش نحبك… أما مازلت ما نجمش نرجع للبلايص لي كنا نتقابلوا فيهم .. مازلت ما نجمش ندخل للبلاصة لي قتلي فيها لي كل شي وفى و الي انت ماعادش تحبني…
و انا زادة ماعادش نحبك.. أما بربي قلي شكون فينا يكذب أكثر من خوه…

زعمة مازالو تصاوري في تاليفونك؟ خاتر أنا فصخت لي قعدلي منك الكل.. تصاورك، كلامك، صوتك.. و علاش لا؟ مادامني ماعادش نحبك.

زعمة مازلت نجي لبالك؟ خاتر أنا كان نلقى نشد مخي نعملو فورماتاج و نفصخك منو… وراسك ماعادش نحبك.

بقلم سارة شويخ