شنوة صار ؟ :ماكرون في تونس يصطاد لربي ؟

Ante-scriptum: Tous les articles paraissant dans la rubrique ‘Politique’ ne reflètent pas nécessairement l’opinion du club.

الجمعة هاذي طل علينا ميسيو ماكرون رئيس الجمهورية الفرنسية و بخلاف انو زيارتو تسببت في ازدحام خانق بالطرقات و بتطويق امني في العاصمة تقول الواحد في غوانتنامو الا انو برشا معاني نجمو نستخرجوهم من هالزيارة الي نجمو نعتبروها محاولة لاعادة الهيبة الفرنسية

بعد زيارة اردوغان و التطورات السياسية في تونس فرنسا حست روحها بدات تخسر في حليف استراتيجي باش منقولش مستعمرة اقتصادية فبلادنا مرتبطة بالسوق الفرنسية بشكل كبير الشيء هذا بدا ينقص بشكل واضح خاصة بعد اكتساح السلع التركية ، الصينية و الامريكية … المشكلة موش هوني في الاخر سوقنا صغيرة و موش باش يقلق حتى دولة كان تخسرها .. المشكلة انو بلاد كيما تونس هي دولة مصدرة للافكار و بعد الربيع العربي تونس ولات محل اهتمام عالم كامل باعتبارها بصيص امل الديمقراطية عند العرب وكيما يقولو المصارى :الاجابة تونس .. المهم الثقافة الفرنكوفونية معادش عندها نفس الاشعاع كيما قبل في بلادنا .. و فرنسا معادش مثال نجاح و تطور عند التوانسة و فما حتى مشروع لتخلي التدريجي على التعليم الفرنكفوني و لغة شيكسبير باش تشكب على لغة مولير

الشيء هذا خلى ماكرون يجري باش يستعيد نفوذو المعنوي في شمال افريقيا و بداية في تونس باعتبار علاقتو الكبيرة ببلادنا خاصة قبل الانتخابات و المشروع كان ساهل ؛ علاش الشركات الفرنساوية تمشي تستثمر في آسيا و انتم جيراننا اولى بالمعروف و تونس نساندوها في ديمقراطيتها و محلاكم و محلى شمسكم و تصويرة مع البجبوج و دورة في البلاد العربي و السلام ؛

كي نرجعو للواقع نلقاو القرارات لا ترتقي للمطلوب .. تحويل ديون لاستثمارات ، جامعة فرنسية خاصة ( يعني بالفلوس .. برشا فلوس) و حفنة اتفاقيات تعاون ..يعني لا ياقفو معانا عام الضربات الارهابية و يجيو تو يحبو يقاومو الارهاب … يعتبرونا جنة ضريبية و يحطونا في القائمة السوداء بعد يجيو يشجعو في الاستثمار ..يحبو يطورو الثقافة الفرنكوفونية و مايعطيو حتى منحة دراسة للشباب في فرنسا

سي ماكرون تونس معادش نظام ترضيه يجيبلك بلاد كاملة معاك .. تحب تعاون تونس اعمل طلة على عقود النفط و الملح و غيرهم مالثروات المنهوبة … شوف حل للشباب التونسي المطيش في الشارع في فرنسا .. و حاول تلغي الموروث البيروقراطي الفاشل اللي جابتهولنا بلادك… اما كانك جاي تعمل تحويسة مع بريدجيت هكا تولي حكاية اخرى