علاه؟

نحب نفهم أما منجمتش… ياخي علاه كلمة نحبك، توحشتك، حاشتي بيك… كلمات صعيبة برشا، علاه؟

علاه كلمات ماأحلاها كيما هكا تنجم تكون صعيبة، صعيبة و صعيبة برشا…
علاه تسكت و تخلاها في قلبك؟ و قداه بش يحمل أكا قلبك…
علاه؟ عينين تحكي و فم ساكت…
أغزر، ثبّت، شوف… والله عينيّا بش تنطق… أما فمي… و الله لانجمت… ما نجمتش…
نَحِبْنا و نحب كيفاه نَحِبْنا…
أما إنت زعمة تحبنا ولا تحب تحبنا؟
خاطر أني نحب نحب و نتحب كيفما حد ما حب…
نحب نراك كيفاه تتفكر أتفه حاجاتي…
نحب نراك مركًز معايا في أبسط تصرفاتي…
نحب نراك كيفاه تعرفني و تفهم كل حاجة فياّ… نضحك علاه، نحكي برشا، بردانة و لا راسها يوجع ولا قالقة فادة ولا شبييا… تعرفني تعرفني كيفما حد ما عرفني…
نحب زادا نحب؛ نسرح شوية في عينيك… نضيع شوية أخرى فكل الغابة الخضراء… بعد يرجعني صوتك شوية شوية…
نحب؛ مازالت نحب… نحب نقولها كل الكلمة ألي ماحلاها… أما ديما فما كِلْ أما…
نحب أما منجمش…
نحب أما نخاف…
نحب أما هاني ساكتة…
هوا قالو كل حاجة تخو وقتها و كل حاجة في وقتها مزيانة… هاني ساكة و نستنى…
أما إنتوما بربي لا تكونو كيفي… تكلمو، عبروا، تخليوهاش في قلوبكم، حبوا بعضكم، صيحوها كل الكلمة في الشوارع خرجوها من جوارحكم… عيشوا حكايتكم.. و خليوني عايشة حكايتي وحدي… خاطر عينيه… عينيه حكاية وحدها…