شنوة صار ؟ الديجيتال هو الحل

بحكم مفماش جديد يذكر في تونس و في العالم الجمعة هاذي بخلاف تمجديق الحناك متع العادة اليوم قلت نحكيو على حاجة تجم تعطينا شوية امل في الدنيا

خليني قبل كل شيء نسألكم .. تعرفوشي شنوة يربط انجيلا مركل المستشارة الالمانية و شينزو ابي رئيس وزراء اليابان بخلاف انهم زوز زعماء دول ؟

الجواب هو انهم الزوز ولاو من مدة قصيرة مواطنين رقميين لدولة استونيا.. مفهمتو شيء ؟ شمعناها مواطنين رقميين ؟ و شنية استونيا ؟ وسعو بالكم معانا شوية تو كل شيء يوضاح

ليوم باش باش نحكيو على استونيا بلاد صغيرة في اوروبا الشرقية البلاد صنفوها اكثر بلد متطور تكنولوجيا فبعد ما خرجت مالاتحاد السوفياتي مهلهلة بالفقر و التخلف قررت انو تشد ثنية الديجيتال و التطور و بكفائتها دخلت سوق التكنولوجيا و عملت القهر و مالنجاحات هاذي نعرفو سكايب و ترانسفو وايز و غيرها مالشركات الكبيرة اللي اصلها مالبلاد الاعجوبة هاذي

ممكن سبب النجاح متع نمر اوروبا الشرقية كيما يعيطولها هو انو مكانش عندها برشا خيارات بعد ما استقلت مالسوفيات في اول التسعينات الشعب الاستوني اللي هوما مليون و ثلاثمية الف يعني اكثر شوية من حي التضامن لقاو رواحهم في بلاد متدمرة فقيرة الموارد فتعلمو يكوديو و بداو ينتجو… و ياحبيبي على الانتاج .. اليوم الدخل الفردي الخام اعلى معدل في اوروبا و البلاد الكل ديجيتال المواطن عندو بطاقة فيها المعلومات الشخصية متاعو الكل و يجم يقضي كل شيء اونلاين مغير شدان صف مغير ارجع غدوة مغير بيروقراطية

زيد على هذا انو الاطفال في استونيا يتعلمو يكوديو مالمدرسة و الديجيتال ولا ثقافة بلاد

الشيء هذا موقفش غاد استونيا اليوم تعطي الحق لكل انسان في العالم انو يتمتع بالمواطنة الرقمية و تعطيه الحق يعمل حساب بنكي غاد و يحل شركة هذايا الكل خلى استونيا مصدر للتكنولوجيا في العالم رغم صغرها و رغم الصعوبات الكبيرة كيما الهجمة الالكترونية في 2007 اللي خلات استونيا تبدل استراتيجيات الحماية المعلوماتية و توصل تعمل وزارة الدفاع الالكتروني و كل شيء ولا محمي بالبلوكتشاين

نرجعو لبلادنا .. معندناش برشا خيارات .. سوق صغيرة مفماش موارد طبيعية كان الدماغ .. وقتاش باش نسيبو علينا مالادرات البائسة و سياسات القرون الوسطى و نتعداو للقرن الواحد و العشرين .. صحيح فما بوادر نجاح .. فما شباب قاعد يحاول اما باش نوصلو نوليو قطب مصدر للتكنولوجيا لازم الشيء هذا يولي سياسة دولة كاملة